News-Details

Niev num e fotovoltaica sin tetg

28.05.2020

DA HANS HUONDER/FMR

La suprastonza communala da Mustér damonda il cussegl da vischnaunca
per in credit da rodund diesch milliuns francs per l’emprema etappa d’engrondaziun e sanaziun dil Center da sport e cultura. Aschilunsch che quel approbescha il project e credit l’autra jamna, duei il pievel votar giudlunder il settember. Da niev duei il center senumnar «Center Fontauna». Il Center da sport e cultura Mustér ei da grond’impurtonza ton per indigens sco turists ed aschidadir da muntada regiunala. Dapi sia realisaziun avon 40 onns eis el vegnius cumpletaus, engrondius e sanaus parzialmein differentas ga. En connex culs plans per la surbaghegiada sigl areal dil vegl hotel Acla da Fontauna ein lu naschidas ideas co ins savess far il center pli attractivs. Sco quei ch’il president dalla cumissiun da menaschi e gerau Clemens Berther di, spetgan ils iniziants dalla surbaghegiada sillas davosas decisiuns, vul dir silla risposta dalla dertgira en connex cun in recuors: «Els vulessen entscheiver a baghegiar aschi spert sco pusseivel.» Ils iniziants e la vischnaunca seigien en bien contact, era pertuccont il project dil center. «Els beneventan nossas intenziuns. Sco ch’els san entscheiver a baghegiar, vegnin nus era a discuorer davart ina eventuala colligiaziun dil center cun l’autra vart dalla via. La surbaghegiada dess veta, era el center»,
puntuescha Berther. Ei savessi eventualmein era dar ina cooperaziun el marketing.

Duas etappas
Che differentas parts dil Center da sport e cultura han in basegns da sanaziun ei indiscutabel.
Dapli discussiuns ha la cumpletaziun dau ils davos onns dapi ch’il project vegn tematisaus. Differentas variantas ein vegnidas sin meisa. Per las lavurs da studi e da projectaziun ei vegniu concediu en tut bunamein in miez milliun francs. Sin fundament dils discuors occurri sco era las reacziuns ord sedutas dil cussegl da vischnaunca, propona la suprastonza communala ussa in project en duas etappas. Tut en tut vegn plidau da cuosts da 14,08 milliuns francs. L’emprem’etappa ei calculada cun cuosts da 10,6 milliuns francs. Quella pertucca lavurs da sanaziun, remplazzament ed amplificaziuns en halla da tennis, halla da gimnastica, halla da reiver, l’entrada ed ina stanza da giugs ella cafetaria, center da visitaders, lavurs dil contuorn e la plazza da giugs. Ina part essenziala dil project ei ina nova purschida
ella localitad sut la halla da tennis che survescha il mument surtut sco deposit. Leu eis ei previu d’ereger in niev center da fitness, ina sala plurivalenta sco era indrezs sanitars. En ina secunda etappa fuss ei lu previu d’ereger ina nova gallaria per visitaders per la halla plurivalenta, ulteriuras lavurs dil contuorn, in parc da moviment, d’allontanar las petgas ella Sala Fontauna sco era da far ulteriuras lavurs. Quella secunda etappa custass rodund quater milliuns francs. Negin tema pli ei il baghetg supplementar per squash. Medemamein ein ins sedistanziaus dall’idea da midar igl anteriur local dils pumpiers all’entrada dil center en irals da bowling.

Fotovoltaica sil tetg
La Repower ei promta d’ereger in indrez da fotovoltaica sil tetg dil center. «Cheutras sa la vischnaunca spargnar rodund 180000 francs per ina cuvrida nova. Leutier vegn il center a saver retrer igl avegnir l’energia producida leu per cundiziuns specialas», di Berther. Ils proxims 20 onns – aschi ditg cuoza era il contract culla Repower – sappi la vischnaunca spargnar aschia 150000 francs per energia. Vid ils cuosts totals da 10,6 milliuns francs per l’emprema etappa retscheiva la vischnaunca ina prestaziun d’equivalenza dil Program San Gottardo da 460 000 francs. Plinavon sa ella quintar culla restituziun dalla taglia sin plivaleta ell’altezia da 450000 francs. Consequentamein damonda la suprastonza communala ussa il cussegl per in credit da 9,69 milliuns francs. La finanziaziun da quella summa duei succeder denter auter era cun in credit senza tscheins dil Program San Gottardo ell’altezia da dus milliuns francs, sco era cullas reservas fatgas persuenter dalla vischnaunca ils davos treis onns ell’altezia da 2,8 milliuns francs. La cumissiun da menaschi dil Center da sport e cultura che ha elavurau in concept detagliau pil menaschi futur, quenta che l’investiziun s’effectueschi a moda positiva ils proxims onns sil quen dil center, respectivamein dalla vischnaunca.

In niev num
Da niev duei il center buca pli senumnar Center da sport e cultura, mobein «Center Fontauna». Per la cumissiun da menaschi duei la midada da num succeder per differents motivs. Denter auter argumentescha ella quei culla modernisaziun dall’infrastructura che duei era semanifestar en in niev num, ina nova identificaziun. Il num «Center Fontauna» duei vegnir cumpletaus cun «sport – recreaziun – occurrenzas». Aschilunsch ch’il parlament communal accepta il project e credit ils 5 da zercladur 2020, duei quel vegnir suttamess per approbaziun al pievel ils 27 da settember 2020.