News-Details

«Grondius resultat»

28.09.2020

«Grondius resultat»
Clar gie al credit pil Center Fontauna a Mustér

DA HANS HUONDER/FMR
Cun 711 gie encunter 379 na han vischinas e vischins da Mustér acceptau la dumengia il credit net da 8,69 milliuns francs per la sanaziun ed engrondaziun dil Center Fontauna. Las lavurs da baghegiar vegnan ad entscheiver en rodund in onn e cuzzar entochen 2023. «Quei ei in grondius resultat
», di il president dalla cumissiun da menaschi e dalla cumissiun da baghegiar dil Center Fontauna, Clemens Berther. El hagi buca spitgau in aschi clar resultat, mo quel muossi, che la cumissiun hagi fatg buna lavur ed era orientau endretg: «Igl ei secapescha bi da sentir in tal sustegn per quei project.»

Lavurs duront treis onns
Ladinamein vegn la cumissiun da baghegiar ussa a cuntinuar culla lavur. «Ussa ha ei num sclarir tut ils detagls per che la damonda da baghegiar sappi vegnir inoltrada. Parallelmein vegnin nus a
scriver ora las lavurs. Sche tut va tenor plan lessen nus entscheiver cullas lavurs da baghegiar igl atun 2021», di Clemens Berther. Da sclarir en quei interval ein denton era tuttas davosas damondas
pertuccont la finanziaziun. La finamira dalla cumissiun da baghegiar ei da terminar las lavurs enteifer treis onns. Enteifer quei temps duei il menaschi restar pli u meins en funcziun.

In object da 40 onns
Il project da sanaziun e cumpletaziun dil Center Fontauna cumpeglia duas etappas. Per l'emprema ha il suveran ussa concediu in credit general net da maximalmein 8,69 milliuns francs. Ils cuosts
totals per quell’etappa importan 10,6 milliuns francs. Cantun, Confederaziun e Project San Gottardo han sincerau lur sustegn finanzial. Il Center da sport e cultura ei vegnius eregius avon rodund 40
onns. Pli tard eis el vegnius cumpletaus cun in ulteriur baghetg culla Sala Fontauna e cul plaz da ballapei. El ei buca mo in liug tschercau da biars indigens, mobein da glieud che fa sport dall’entira regiun. El ei denton era il center per sport e cultura da biars hosps da vacanzas ed onn per onn generescha el plirs mellis pernottaziuns cun localitads sutterranas che surveschan sco camps.

René Epp niev president communal

Cun in brigliant resultat ei René Epp vegnius elegius sco niev president communal da Mustér e
successur da Robert Cajacob. Tier in absolut pli da 475 vuschs ha el obteniu 891 vusch. «Jeu haiel
fetg grond plascher da quei resultat. El muossa che la confidonza en mia persuna ei fetg gronda.
Quei dat curascha, forza e motivaziun da luvrar en favur dalla vischnaunca», di René Epp sin
damonda dalla FMR. Quei resultat obligheschi denton era. Vegni reelegi en suprastonza communala ein Iris Lombris-Manetsch (739 vuschs), Clemens Berther (632) e Wendelin Jacomet (606) tier in pli absolut da 339 vuschs. Niev commember dall'executiva ei Paul Flurin Schmidt (638). El cussegl
da vischnaunca han vischinas e vischins da Mustér elegiu Roland Cajacob (639), Silvia Bucheli-Caduff (612), Adrian Deflorin (595), Otmar Flepp (558), Giusep Lozza (556), Adrian Flepp (553),
Edgar Durschei (515), Helga Probst- Linder (501), Martino Sabbadini (500), Mario Flepp (499),
Armin Berther (497), Theres Burri Gadola (476), Larissa Fry Schuster (476), Ignaz Venzin (431)
ed Armin Manetsch (415). Buca vegni elegi ein Remo Huonder (399), Fabio Calia (382), Rafael
Maissen (366) ed Agim Bajraktaraj (258).

Alla cumissiun da gestiun appartegnan ils proxims quater onns ils treis novs Sonja Lutz-Schmidt (793), Flavio Murer (748) e Curdin Cajacob (744). Elegi el cussegl da scola vegnan Adrian
Bigliel (785), Simon Bergamin (711), Marisa Dermon-Möckli (567) e Clarissa Loretz-Duff (335). Buca elegidas ein Manuela Venzin-Zazzi (328) e Susanne Strupler (274). La participaziun allas elecziuns communalas ha muntau a 69 pertschien.