News-Details

Seduta constitutiva dil cussegl da vischnaunca

11.01.2021

Ina ceremonia per quater onns

Venderdis ei il cussegl da vischnaunca da Mustér seradunaus a sia emprema seduta dalla nova perioda d’uffeci 2021-2024. Quei ei cumbinau cun ina ceremonia. Tradiziunalmein eis ei ina sentupada libra cun bia glieud. La seduta constitutiva dil cussegl da vischnaunca ei bein ina manifestaziun interna, tuttina eis ei in’occurrenza cumbinada cun emoziuns e participaziun dil pievel.
La ceremonia per la perioda 2021-2024 ha Covid-19 dictau. Enstagl da dar il maun in a l’auter
han ins purschiu in a l’auter ils pugns ed ils cumbels, e tuts han giu da purtar mascrina. Sco siu niev president ha il cussegl elegiu Giusep Lozza, vicepresident ei Adrian Deflorin. Avon ch’el ei vegnius saramentaus ha il president communal niev René Epp rendiu attent al program da legislatura. La suprastonza presenta quel primavera a cussegl e populaziun.

«Lein empruar da s’avischinar»
Seduta constitutiva dil cussegl da vischnaunca da Mustér dalla perioda 2021-2024

AUGUSTIN BEELI/FMR
„Mintga quater onns eis ei in’occurrenza festiva dalla politica communala da Mustér. Per sia emprema seduta dalla  nova perioda d’uffeci s’entaupa il cussegl da vischnaunca tradiziunalmein ella halla Cons. Uonn ei quei buca stau pusseivel. Venderdis ei l’emprema seduta stada, conform allas directivas da Covid-19, el Center Fontauna. Musica, cant, plaids, honoraziuns, sblatschar e dar
il maun in a l’auter s’auda tier quell’occurrenza. Silmeins tochen igl onn vargau fuva quei aschia. La seduta constitutiva dil cussegl da vischnaunca da Mustér ei in act ufficial special ch’ei mo mintga quater onns e mo en paucs loghens aschi festiv e dign. Inagada embellescha la Societad da musica
da Mustér quel, inagada il Chor-baselgia s. Gions, inagada il Chor-baselgia da Segnas. L’emprema seduta dalla legislativa entscheiva cun undraziuns, il cussegl elegia presidi e vicepresidi, las autoritads vegnan saramentadas. La lavur d’ina nova perioda d’uffeci entscheiva buca dapertut aschi dignamein sco a Mustér.

Bach, Mozart, Rachmaninov
Uonn han las circumstanzias influenzau l’organisaziun. La halla dil Center Fontauna ha lubiu d’organisar ina seduta festiva. Autoritads e visitaders han giu avunda plaz, la distanza e la mascrina han denton dau all’occurrenza ina tempra particulara. Enstagl dalla societad da musica ni d’in
chor han musicistas cun instruments a corda ed in pianist embelliu la seduta constitutiva. Oana Camartin, cun sias scolaras Lilian Probst e Valeria Hendry, accumpignadas dil pianist Metusz Niedzwiedski, han sunau biala musica da Mozart, Bach, Rachmaninov ed auters dalla romantica e classica. En siu plaid da beinvegni ha il president communal niev en uffeci annunziau ils principis che dueien valer per sia lavur da mintgadi. René Epp metta el center denter auter la buna communicaziun interna ed externa, cun transparenza, loialitad e respect. Il president ha menziunau zacontas sfidas
ch’ein en vesta, per exempel ils «babyboomers» che vegnan pensiunai ils proxims onns ella regiun. Entochen gl’onn 2025 stoppien ins remplazzar en Surselva in horrent diember da glieud che cali da
luvrar. Ed ella medema regiun hagi il nivel dallas naschientschas contonschiu in bass historic. Pilver ina sfida. In auter punct seigi la collaboraziun intercommunala. René Epp ha menziunau explicit la scola, il turissem ed il sectur dalla sanadad. «Igl ein d’instradar projects communabels, e quei cura ch’ins ei aunc ferms avunda», eis el dil meini. Quei dueigien ins far cun curascha, detschartadad, toleranza, fidonza e respect. «Mirar mo sils agens interess ed igl agen profit ei buca da cussegliar», ha il president communal puntuau, gliez menassi la finala ell’isolaziun. «Lein empruar da s’avischinar aunc pli fetg ed aschia surprender responsabladad per nossa generaziun vegnenta», ha il president communal, naschius 1982, dau d’entellir.

21 «plazzals»
En connex cullas finamiras dall’executiva ha el annunziau claras visiuns e prioritads. Da quellas vegni il cussegl da vischnaunca a saver prender enconuschientscha ad ina da sias proximas sedutas, la populaziun vegni informada questa primavera. Il president ha inclus 21 «plazzals da baghegiar»
per in program dalla perioda d’uffeci 2021-2024. Denter quels va ei per reactivar il hotel Disentiserhof e coordinar la realisaziun dil hotel Acla da Fontauna. Concept da parcar e concept d’illuminaziun
ein projects pli pigns. In pli vast e delicat ei quel d’anflar ina clara strategia turistica communabla. Sper auter ha René Epp era menziunau ch’ins sestenti d’anflar bunas sligiaziuns pil naufragi all’urna dil project Val Segnas-Val Sogn Placi. Ei detti bia da far duront la perioda d’uffeci gest entschatta,
impurtont seigi da priorisar las finamiras e da definir las mesiras, ha René Epp detg. Silsuenter ha il cusseglier Edgar Durschei, sco «doyen» dalla legislativa da Mustér, menau las elecziuns dallas autoritads communalas. Suenter quei act ha il cussegl da vischnaunca elegiu unanim Giusep Lozza
sco siu president per 2021 ed Adrian Deflorin sco vicepresident. Clemens Berther ha il cussegl elegiu sco vicepresident.

Plaid dil president communal

Fotografia 1

Fotografia 2

Fotografia 3

Fotografia 4

Fotografia 5

Fotografia 6

Fotografia 7

 

 

 

 

 

 

fileadmin/user_upload/Downloads/001.jpg