| Nus havein enconuschientsch da dus tiarms d'impurtonza egl operar da quella societad: La fiasta cantunala da musica da 1845 a Glion e l'inauguraziun dalla Punt gronda denter Mustér e Sumvitg, anno 1857.
L'emprema fiasta cantunala da musica da 1845 a Glion
Da quei temps deva ei el Grischun probablamein mo sis societads da musica:
Doman (fundaziun 1803), la 'musica militaris' dils students claustrals da Mustér (1812), la musica dils cadets da Cuera (1822), quellas da Glion ed Mustér (omisduas 1844) ed aunc ina societad a Cuera.
Dalla fiasta da Glion, 1845, raquenta il cronist da Mustér el protocol il suandont:
"Ils 19 de Juli ei nossa societad sut la bandiera della part sura seballuccada naven da Mustér, per setransportar a Glion sin ils 20 digl emprem meins, per assister alla fiasta sco sommembers de tala. Denter Glion e Strda ha la societad de Glion, en tutta pumpa sut la reschnova e bila bandiera retschiert nus, e nus accumpignai da quella essan passai tras in grond diember de aspectaturs, amitgs della Bechmusica e mervegliusas femnas veglias, secampadas da questa vart della pun serendi en casa gronda, nua che la societad de Glion ha ordavon nus gustau cun in delicat glas vin, e silsuenter partiu ora bigliets de quartiers tier las meglieras famiglias de Glion es St. Clau" |
