Suenter ch'ils instruments han fatg puorla e ruina ca. 20 onns, succeda zacu 1878/79 per la secunda gada la fundaziun d'ina societad da musica a Mustér. Il datum exact ei buca enconuschents. Quella secunda fundaziun ha denton giu success permanent entchen sil di dad oz.

Musicants fundaturs da 1879 - entuorn 1890. Cun il helicon Giachen Antoni Andreoli

Ils fundaturs da 1879
Siat giuvens idealists han fundau la societad da musica Mustér, numnadamein:
Ludivic Castelberg
Giachen Antoni Andreoli
Martin Andreoli
Battesta Andreoli
Giachen Venzin
Baseli Venzin
Toni Manetsch

Igl emprem dirigent da quels siat musicants ei staus in da Tujetsch, il scolast e bostger Stiafen Schmed. Pli tard eis el emigraus ell'America.
Igl ei ualti difficultus d'eruir il traffic musical da lezzas uras. Tonaton raquenta la tradiziun enqual caussa remarcabla. Ils instruments han ils musicants survegniu si da Glion ad emprest. Enzacons onns suenter la fundaziun han ils musicants tratg si ina collecta en vischnaunca ed aschia saviu cumprar agens. Per ch'ei tonschi ha la vischnaunca aunc schau pinar e vender treis buoras.