SERA D’INFORMAZIUN 22-08-2025
venderdis, ils 22 d’uost 2025 allas 20:00 – 21:30 en halla Cons
Project da sanaziun Via Cons
La sanaziun dalla Via Cons, surtut dalla canalisaziun e deflussiun, ei indispensabla. Suenter la refusada dil credit entras il suveran egl onn 2024 ei vegniu elaborau in niev project che vegn en votaziun ils 28 da settember 2025. Ils responsabels presentan il project surluvrau.
Plattafuorma communala digitala (Crossiety)
La communicaziun vegn adina pli impurtonta e digitala. La vischnaunca da Mustér vegn ad iniziar naven digl emprem da settember 2025 ina nova reit sociala per la communicaziun ed il brat activ enteifer uniuns, commerci e populaziun.
Revisiun totala dalla planisaziun locala
Dapi entgins onns sefatschenta la vischnaunca cun la revisiun totala dalla planisaziun locala. Il davos zercladur 2025 ha la suprastonza communala deliberau ils documents da votaziun (plan da zonas e lescha da baghegiar). Ils responsabels presentan ils pli impurtonts puncts da quella revisiun, che vegn tractada ils 10 da settember el cussegl da vischnaunca ed ils 30 da november alla votaziun all’urna (cun resalva dalla decisiun dil cussegl da vischnaunca). Suenter las informaziuns e la discussiun vegn offeriu in apero.
Referents:
- René Epp, president communal
- Wendelin Jacomet, gerau
- Iso Mazzetta, planisader Via Cons
- Esther Casanova, planisadra
- Roland Cajacob, meinafatschenta
