QUEI EI STAU IL PREMI DESERTINA 2026
Venderdis, ils 16 da schaner 2026 ha la suprastonza communala e la cumissiun responsabla astgau surdar il Premi Desertina, che secumpona ord il premi da renconuschientscha ed il premi da promoziun. Plinavon havein nus astgau beneventar il retg da lutga Armon Orlik e remunerar el per sia gronda prestaziun.
Il premi da renconuschientscha ha Simon Camartin astgau prender encunter. Per el ei quei stau ina surpresa. En siu plaid d’engraziament menziunescha el ch’el seigi vegnius en halla Cons quella sera per veser il retg da lutga. Sch’el havessi saviu ch’el vegni undraus havessi el mess si ina cravatta, di Simon Camartin. Ella laudatio da Giusep Giuanin Decurtins honorescha el ils nundetg gronds merets da Simon Camartin en connex cun la cultura en nossa regiun.
Laudatio da Giusep Giuanin Decurtins per Simon Camartin
L’uniun da dunnas ha astgau prender encunter il premi da promoziun. La laudatura Madleine Deflorin menziunescha la gronda lavur voluntaria che l’uniun cun sias 220 commembras presta biaras gadas el zuppau en favur da nossa societad. L’uniun exista gia dapli bia onns ed ei ina impurtonta petga per nossa vischnaunca.
Laudatio da Madleine Deflorin per uniun da dunnas
Il retg da lutga e burgheis da Mustér Armon Orlik ei vegnius a Mustér ensemen cun ses geniturs Paul e Helena Orlik. En siu plaid da honoraziun ha il president communal René Epp remunerau la prestaziun dad Armon Orlik, che ha gudignau la fiasta federala da lutga a Mollis cun curascha, forza, perseveronza e caracter. El ha punctuau las fermezias e ludau las prestaziuns dil retg el resgem. El seigi in exempel per la giuventetgna ed in che muossa che prestaziun e caracter audan ensemen. Alla fin dalla honoraziun ha il president communal surdau ad Armon Orlik ina cristalla ord il museum Cristallina da Mustér, che duess regurdar el vid sias ragischs.
Armon Orlik menziunescha en siu plaid ch’el seigi adina vegnius bugen sin viseta dil tat e la tatta a Disla. Insumma sesentien els adina fetg beinvegni a Mustér.
Plaid da honoraziun da René Epp per Armon Orlik.
La sera ei vegnida enramada musicalmein da «Cantus Avis» sut la direcziun da Rilana Cadruvi, dalla gruppa da rock «Galiots» cun ragischs a Mustér e da Laurin Bucheli, che ha sunau plirs tocs sin l’orgelin svizzer.
