VOTAZIUN DILS 8 DA MARS 2026 – MESSADI

La regiun sisum la Surselva dispona da vastas purschidas per affons e giuvenils el liber (outdoor). Auter vesa ei ora cun pusseivladads ed activitads da divertiment, recreaziun e moviment per affons e famiglias da schliat’aura (indoor). Plinavon ei l’acrobatica daventada in’impurtonta sparta da sport per affons e giuvenils ella regiun. Las Pendicularas Mustér e la vischnaunca vulan realisar ensemen in niev parc da giugs e moviment cun center d’acrobatica sigl areal dil Center Fontauna.

SERA D’INFORMAZIUN CUN PRODUCZIUNS GRUPPA D’ACROBATICA

Venderdis, ils 20 da fevrer 2026 allas 20:00 – 21:30 en halla Cons

 

Program

Beinvegni	René Epp
Strategia Pendicularas Mustér	Stefan Arnold
Project “Parc da giugs e moviment cun center d’acrobatica”	Roland Cajacob
Finanziaziun e dretg da baghegiar	René Epp
Informaziun UGC ed Acrossuisse	Anja Klittich Berther, Kerstin Wadsack
Optica Sedrun Disentis Tourismus	Silvio Schmid

 

Suenter las informaziuns e la discussiun ed ina producziun entras la gruppa d’acrobatica vegn offeriu in apero.

 

PROJECT

 

Il project ella valeta da frs. 9-10 milliuns cuntegn in areal cun installaziuns da termagliar e da moviment per affons e giuvenils sco trampolins, ruschneras, eav. sco era in local cun in plantschiu specialisau per acrobatica. Per ils carschi ch’accumpognan ils affons e giuvenils ei planisau in areal da setener si cun vesta sil plaz da giugs e sil local d’acrobatica.

La regiun sisum la Surselva dispona gia oz da vastas purschidas per affons e giuvenils el liber (outdoor). Davart purschidas da malaura (indoor) dispona la regiun en emprema lingia cunzun da purschidas da sport. Auter vesa ei ora cun pusseivladads ed activitads da divertiment, recreaziun e moviment per affons e famiglias da schliat’aura (indoor). Quellas ein fetg limitadas. Cun il niev parc da giugs e moviment vegnan quellas purschidas ad esser avon maun. Plinavon ei l’acrobatica daventada in’impurtonta sparta da sport per affons e giuvenils ella regiun. La gruppa d’acrobatica dall’Uniun da gimnastica Cadi ei la suletta gruppa el Grischun che separticipescha a concurrenzas d’acrobatica. En Svizra existan actualmein treis centers regiunals da prestaziun d’acrobatica. Cun l’activitad el sectur dall’acrobatica havess Mustér la pusseivladad da daventar il quart center regiunal d’acrobatica. L’Associaziun d’acrobatica svizra (Acrosuisse) sustegn quei intent. Persuenter basegna ei denton ina localitad da trenament cun in plantschiu special per quei sport.

L’investiziun per la realisaziun dil project vegn purtada dallas Pendicularas Mustér. Cundiziun ei denton, che la vischnaunca da Mustér separticipescha vid ils cuosts entras desister sin la restituziun d’in credit restont ella valeta da frs. 1.75 milliuns. Quei credit haveva la vischnaunca giu concediu allas Pendicularas Mustér egl onn 2016 per la realisaziun dalla pendiculara Sedrun – Cuolm da Vi e per auters projects dallas pendicularas. Da quels frs. 1.75 milliuns ei 1 milliun da capir sco co contribuziun al liug (Standortbeitrag) a fonds perdu e frs. 750’000 vegnan scuntrai cun la purschida dalla Golden Card.

Alla seduta dil cussegl da vischnaunca ha quel approbau il contract da dretg da baghegiar denter la vischnaunca da Mustér e las Pendicularas Mustér sut las cundiziuns suranumnadas.

Sur dalla renunzia dil deivet ella valetta da frs. 1.75 milliuns vegnan las votantas ed ils votants da Mustér a decider all’urna ils 8 da mars 2026.