News-Details

In niev plan da termins

23.01.2019

DA HANS HUONDER / ANR

La primavera vargada ha il cussegl da vischnaunca da Mustér returnau alla suprastonza communala il project davart l’engrondaziun e sanaziun dil Center da sport e cultura cul giavisch da reponderar differentas ideas. Il gliendisdis sera eis el vegnius orientaus davart las midadas ed il plan da termins actual per quella fatschenta. Suenter l’informaziun succedida ussa vegn il messadi detagliau elavuraus e tractaus en rodund in meins dalla supra stonza communala. La fin da mars vegn il cussegl da vischnaunca allura a decider davart il project ed igl emprem da matg ei previu in’orientaziun dalla popula ziun. Ils 19 da matg 2019 duei il suveran allura decider definitivamein davart il project da sanaziun ed engrondaziun. Sper ina cumpletaziun dalla purschida duei il baghetg vegnir sanaus.

Sanaziun necessaria
Il Center da sport e cultura a Mustér ei rodund 40 onns vegls. En quels quater decennis
eis el vegnius cumpletaus ed adattaus, denter auter 1993 cun la Sala Fontauna e la plazza da ballapei. Avon siat onns ei ina gronda part dils indrezs ordaviert vegnida remplazzada e sanada per bunamein in milliun francs ed avon dus onns ei vegniu investau ella sanaziun dallas fatschadas dil nord e vest. La gronda part dil baghetg ei denton aunc adina el stan da 1980 e basegna ina sanaziun. Per part ei ina tala urgenta. Sin fundament da quella situaziun ha la suprastonza communala presentau la primavera vargada al cussegl da vischnaunca in project da sanaziun ed engrondaziun cun cuosts da rodund 15 milliuns francs. Per la sanaziun digl existent era previu d’impunder 6,5 milliuns francs, per la purschida nova 8,6 milliuns francs. Previdas eran differentas midadas e surtut era in’entrada nova. En sia seduta la primavera vargada ei il cussegl da vischnaunca allura buca suandaus cumpleinamein l’idea dalla suprastonza communala ed ha returnau il project cun l’incarica da surluvrar el. Il cussegl da vischnaunca ha deponiu differents giavischs il medem mument.

Differentas midadas
Il project presentau il gliendisdis sera preveda pliras midadas en cumparegliaziun cul project d’avon in onn. Vinavon all’entrada dil center duein la cafetaria e la recepziun esser sco era ina cuschina nova ed il local da bowling. Quella soluziun lubescha al center da luvrar fetg raziunalmein era cul persunal. Damai che la cafetaria sesanfla egl avegnir leu eis ella era bein veseivla neu dalla via cantunala ed envida aschia da far ina viseta el Center da sport e cultura. La halla da tennis duei survegnir in niev plantschiu. Tenor il gerau Clemens Berther ch’ha orientau il gliendisdis sera davart il project communablamein cul menader dil center Gion Hosang ed igl architect Simon Bisquolm han ins schau cussegliar differents experts tgei cuvrida prender, denter auter ein era giugadurs da tennis dil liug vegni consultai. La cafetaria d’ussa duei survir egl avegnir sco local da sedivertir per affons pigns. Egl anteriur grond local sut la halla da tennis ch’ha surviu pli baul sco luvratori pil menaschi tecnic dalla vischnaunca duei vegnir endrizzau in niev center da fitness sco era ina nova sala per diever multifar cun ina surfatscha da 174 meters quadrat. Daspers – encunter las plazzas da tennis – duei vegnir erigiu ina nova halla da squash. Novaziuns ein allura era previdas ella halla da reiver, quella duei denter auter vegnir cumpletada cun pusseivladads da bouldern.

Buca dapli persunal
La finamira dil project d’engrondaziun e sanaziun ei da procurar ch’ei sa vegnir luvrau era egl avegnir cul medem diember da persunal sco ussa. Davart ils cuosts vegnan las instanzas pertuccadas orientadas il fevrer e mars. Tenor Berther duessen quels denton buca surpassar ils 15 milliuns francs previ oriundamein. Medemamein ei il cussegl da vischnaunca vegnius orientaus il gliendisdis sera davart il project per in niev indrez da fotovoltaica sil tetg dil Center da sport e cultura. Tenor Ivo Schillig dalla fundaziun Alpenforce ein tschun offertas, respectivamein variantas sin meisa per reponderaziun.