News-Details

In’attracziun per giuven e vegl

04.07.2019

(anr/hh) L’uniun «VolksEisen» organisescha dumengia proxima a Mustér l’emprema sentupadada  «tuning» d’autos dallas marcas V.A.G. Cumbinada vegn ella cun bia da magliar, dabeiber e leutier musica. L’uniun «VolksEisen» dumbra 16 commembras e commembers dalla regiun sisum la Surselva e plirs dad els serendan regularmein cun lur autos a sentupadas da «tuning» ella Bassa ed egl exteriur. «Nus essan lu sedumandai schebein nus duessen buc era sezs organisar ina tala sentupada cheu tier nus», di il president dall’uniun Raffael Monn. Detg e fatg: Dumengia proxima, ils 7da fenadur 2019 ei quei emprem arranschament che porta il num «1. Volkseisen V.A.G.» La sentupada vegn organisada a Plaun da Diras sut Segnas e cuoza dallas 09.00        entochen allas 16.00. Da veser ein autos originals, mo era midai da V.A.G, vuldir VW, Audi e Skoda. Ils organisaturs cun Raffael Monn alla testa spetgan denter 150 e 200 autos. Sper l’exposiziun da vehichels vegn era purschiu in «Streetfood» entras treis ustrias da Mustér e musica. Ils diesch pli bials vehichels ed ils tschun pli specials obtegnan in premi. Pils visitaders dalla sentupada stattan parcadis medemamein a disposiziun.