News-Details

Autos ed egls tarlischonts

08.07.2019

DA HANS HUONDER / ANR


La dumengia vargada ha l’uniun «VolksEisen» envidau all’emprema sentupa da «tuning» a Mustér. Stai da veser ein autos dallas marcas V.A.G,  vul dir VW, Audi e Skoda. Las participontas ed ils participonts da quei arranschament ein arrivai dalla Bassa e dils cantuns muntagnards vischinonts, mo era singuls digl exteriur. Tut en tut ein biebein 100 autos stai da veser. Il president dall’uniun, Raffael Monn, ei cuntents cun la participaziun ed igl interess: «Nus savevan buca cons che vegnan, quei diember cheu ei in bi success.» Sco quei ch’el ha detg enviers l’Agentura da novitads rumantscha vegn ei a dar ina cuntinuaziun da quella sentupada igl onn vegnent. Il plaz a Plaun da Diras sut Segnas ei ideals per ina tala sentupada.

VW – Audi – Skoda

Talas sentupadas – spirontamein cun autos dallas treis marcas VW, Audi e Skoda – han liug diesch entochen quendisch per onn en Svizra, biaras denton era ella Germania e l’Austria. A quellas serendan era las commembras ed ils commembers dall’uniun «VolksEisen» e leu ei era l’idea naschida d’arranschar enzatgei semegliont a Mustér. L’uniun dumbra 16 commembras e commembers dalla regiun e Monn di: «Quellas scuntradas ein sco sentupadas da famiglia. Biars enconuschan in l’auter.» Quei ei era stau il cass la dumengia a Mustér. Cundiziuns dat ei neginas per separticipar cugl auto ad ina tala scuntrada. Las participontas ed ils participonts pagan sulettamein ina pintga contribuziun el liug. Sco a Mustér derivan ils biars d’in club. Tals dat ei en
pli u meins tuts cantuns.

In hobi

«Quei ei nies hobi e per quel investein nus bia daners ed uras da lavur. Igl ei lu bi da s’entupar cun glieud ch’ha ils medems interess. Aschia sedattan era fetg biaras emperneivlas sentupadas», di Monn che posseda sez in VW Golf II dall’annada 1989 sco era in VW Tip III digl onn 1972 ed in VW Bau digl onn 1971 ensemen cun sia dunna. Ils autos vegls vegnan restaurai en biaras uras da lavur ed els surveschan la finfinala mo ad in intent: «Cun els mein nus sin via sulettamein las dumengias.» Stai da veser ein la dumengia vargada a Mustér denton era models pli novs da VW, Audi e Skoda. Ina buna mischeida da vehichels cun dessegn modern, respectivamein d’avon
onns e decennis.