News-Details

Sustegn per pazients dad MS

10.09.2019

(anr/hh) En 26 loghens en Svizra ei vegniu purschiu la sonda vargada in risotto. En sesez fuss quei gie nuot special, sch’il recav da quella tschavera mass buc en favur dils pazients da multiple sklerose. El Grischun ei la purschida vegnida offerida a Mustér, Glion, Cuera e Fuldera. Il di dalla Gilda svizra dils cuschiniers etabli ei ina part integrala dall’agenda annuala dalla Societad da multiple sklerose (MS). Mintgamai igl atun envida ina partida dils ga stronoms e commembers dalla gilda ad in risotto. In e scadin sa guder quel ed aschia contribuir enzatgei alla perscrutaziun ed agl agid a pazients da MS. Il recav da quei gentar va numnadamein cumpleinamein en favur dalla societad e d’autras instituziuns caritativas. La Gilda svizra dils cuschiniers etabli s’engascha dapi igl onn 1997 en favur dalla Societad svizra da multiple sklerose. Quella purschida a rodund 15 000 pazients pertuccai dalla malsogna, mo era a lur parents, ei in sustegn finanzial e professiunal. La gilda ei in’organisaziun da cuschinieras e cuschiniers ch’ein il medem mument era possessurs d’in menaschi gastronom. Ella garantescha qualitad, creativitad e hospitalitad, aschia ch’ina viseta en in re staurant dalla gilda ei adina era in’aventura culinara e sociala. Quell’atmosfera sa vegnir gudida ton en semplas ustrias sco restaurants da muntogna ni da gourmet.

Purschida el Spar
A Mustér ei il risotto vegnius purschius la sonda da miezdi ella stizun dil Spar e la sera el hotel Rhätia. Quei ei il menaschi da Vreni Werth ch’ei commembra dalla Gilda svizra dils cuschiniers etabli e ch’ha procurau il risotto. Hosp al di da risotto a Mustér ei la musicista Marie-Louise Werth stada, la sora da Vreni Werth. Il risotto sur miezdi el Spar ei dil reminent vegnius offerius uonn per la tiarza ga. Multiple sklerose ei ina malso gna neurologica cronica e pertucca il si stem central dils gnarvs. Tier 80 per tschien dils pertuccai semuossa la malsogna ella vegliadetgna denter 20 e 40 onns. MS ei la malsogna neurologica la pli derasada en quella vegliadetgna. Tier treis entochen diesch pertschien sa MS sesviluppar gia el temps d’affonza, meins savens era ella vegliadetgna da carschi. Da quella malsogna ein il dubel dapli dunnas pertuccadas ch’umens. Ins suppona che quei seigi aschia sin fundament dall’influenza dils hormons. Malgrad ina perscrutaziun intensiva ein ils motivs per MS aunc adina buc enconuschents. En discussiun ei en emprema lingia in connex denter disposiziun genetica ed in’influenza da facturs digl ambient. La malsogna variescha da pazient tier pazient. Ils disturbis pertuccan differentas funcziuns dil tgierp sco per exempel disturbis dalla vesida ni digl equiliber, combas e bratscha schirada entochen mals dalla scufla ni disturbis dalla funcziun dalla beglia. Biars pertuccai dad MS piteschan plinavon da gronda stauncladad, disturbis dalla sensibilitad ni deficits ella concentraziun. Tiels ins han terapias in success parzial, tiels auters insumma negin effect. La malsogna ei aunc adina nuncurabla.