News-Details

Giug festiv en claustra a Mustér 2020

03.10.2019

(anr/gc) Da s. Martin, ils 11 da november d’uonn, vegn la baselgia claustrala a Mustér puspei aviarta. Suenter in temps da restauraziun da dus onns ha la reconsecraziun dil sanctuari cun in niev altar grond liug gest il di dalla fiasta da siu s. patrun. In grond mument. La reavertura da quei edifeci sacral imposant e da bellezia unica duei vegnir enramada d’in’entira retscha dad occurrenzas ton sacralas sco da presentaziuns da gener divers. In dils pli gronds eveniments en quei connex ei bein il Giug fe stiv spiritual «Der Fels und das Schwert» (grep stat per baselgia, la spada per igl assassinat da s. Placi) che vegn mussaus en baselgia claustrala. El rom dil Forum claustral han ils auturs e regissurs presentau e declarau venderdis vargau intent e cuntegn dil giug festiv. Deplorablamein ei quei stau pusseivel el ravugl mo d’in fetg pign publicum.

Tema: La legenda da s. Placi e s. Sigisbert
Scret il giug festiv ha Hanspeter Gschwend, in hosp regular dalla claustra da Mustér ed enconuschents sco autur da giugs auditivs e teaters. Igl autur ha circumscret l’idea fundamentala dil giug. Quella sebasa sin la legenda da s. Placi e s. Sigisbert, risguardond las differentas versiuns. Sco culissa ha el priu Desertina e la cavorgia dil Rein. Las figuras centralas ein: s. Sigisbert, igl um da Diu, vegnius digl jester en tiara deserta e che viva en ina cella, s. Placi, igl indigen cartent e grond sustegn per igl eremit s. Sigisbert ed il preses Victor da Currezia. Quel ha tema pervia dalla’al lianza denter s. Sigisbert e s. Placi per sia pussonza. Quellas treis persunas – cun vitier ils colons paganils ed era il giavel – ein involvi el conflict. Quel contonscha il punct culminont ella scavazzada da s. Placi sin camond dil preses Victor, mo finescha cun la reconciliaziun e la conversiun da quel. La fundaziun dalla claustra ei lu vegnida cumpletada tras siu fegl, uestg Tello. Il giug festiv vegn daus – per tudestg e romontsch – ella baselgia claustrala tschun gadas il mars da l’auter onn tras students e studentas dil gimnasi. Varga 90 dad els coopereschan el chor ed in tozzel sco plidaders. Ins spera fetg che quei Giug festiv spiritual daventi in eveniment regiunal. Il cumponist, Martin Völlinger, era el in amitg dalla claustra, presenta il concept musical. Quel fa punts denter ils schabetgs historics e vegn interpretaus tras chor ed orchester. El ha dau al clavazin zacontas emprovas ord sia ovra, declarau il stil savens semidont digl opus che s’adatteschi cun diversas modula ziuns mintgamai alla scena. La musica surtrai il drama cun in artg en bia colurs. La reschia meinan dus anteriurs scolars dalla claustra: Felicitas Heyerick, actura professiunala, e David Flepp, in reputau giugadur silla tribuna. Els considereschan lur lavur d’inscenar il giug sco in process creativ. Scolaras e scolars dalla claustra han ins gia informau. Els ein stai incantai. Ussa va ei vid la realisaziun. Las emprovas intensivas entscheivan l’en tschatta da l’auter onn. La co-reschia ei fascinada d’astgar metter en scena il giug festiv en e cun ina aschi biala culissa sco la baselgia claustrala a Mustér en nova splendur.