News-Details

Per spért e cuminonza

11.11.2019

DAD ANDREAS CADONAU / ANR

Ton pader Urban Affentranger sco Nadia Deflorin da Las Bagordas e Raffael Monn da
Las Fifferlottas ein stai incantai il vendergis vargau dalla renconuschientscha entras il Premi Desertina.
La geraua e presidenta dalla cumissiun Premi Desertina, Iris Lombris, ha dis curriu da pliras propostas valablas inoltradas dalla populaziun e di gnas da retscheiver il Premi Desertina 2019. Ina distincziun da renconuschientscha e promoziun per activitads dalla cultura e dil sport surdada dalla vischnaunca da Mustér. Pader Urban Affentranger ha retschiert il Premi da renconuschientscha il vendergis vargau principalmein per siu engaschi en favur dil Forum clau stral e sias stentas da promover in spért da discussiun aviert. E las duas musicas da tscheiver Las Bagordas e Las Fifferlottas han astgau retschiever ord ils mauns dil president communal Robert Cajacob mintgamai in Premi da promoziun per lur stentas en favur dalla cuminonza communala da Mustér.

Undrau merets sin differents camps
La vischnaunca da Mustér ha surdau il Premi Desertina

(anr/ac) Pader Urban Affentranger ei vegnius undraus vendergis sera a Mustér cun il Premi da reconuschientscha Desertina per sias stentas en favur dil Forum claustral. Buca meins plascher han las duas guggas Bagordas e Fifferlottas exprimiu per la distincziun da promoziun surdada a medema caschun dil president dalla vischnaunca da Mustér. Pader Urban Affentranger ei sedrizzaus il vendergis sera ella halla Cons a Mustér viers la representanza communala sco viers igl auditori per exprimer siu cordial engraziament. El ha numnadamein astgau retscheiver ord ils mauns dil president communal Robert Cajacob il Premi da renconuschientscha Desertina principalmein per ses merets en connex cun il Forum claustral. In forum ch’igl anteriur cusseglier naziunal Dumeni Columberg ha, en sia laudatio, valetau sco pintga miracla. Enteifer 35 onns e 255 arranschaments han divers exponents dalla politica, cultura ed economia svizra dau suatientscha agl invit claustral per s’exprimer a Mustér publicamein davart temas contemporans. En siu engraziament ha pader Urban regurdau all’entschatta dil forum nua che l’idea ei s’installada en claustra era grazia al support da dus scolars dalla scola claustrala. Oz enconuschents politichers, numnadamein il cusseglier dils stans Stefan Engler ed il president dalla Partida cristiandemocratica e cusseglier naziunal Gerhard Pfister. Gia ella laudatio ha Columberg menziunau il spért aviert dil forum e dall’intenziun da pader Urban da sesarver agl entir spectrum politic, economic e cultural e da promover aschia in spért da discussiun autentic. En quei connex ha pader Urban sez plidentau ina brev digl anteriur cusseglier naziunal e president dalla Partida  socialdemocraticaa Helmut Hubacher scretta suenter sia presentaziun al forum. Leu ei
Hubacher staus envidaus da referir davart la damonda sch’il marxissem seigi insumma aunc opportuns. Ella brev ha Hubacher valetau la dimora a Mustér sco eveniment impressiunont. E palesau siu plascher dil spért dil forum da sescuntrar cun objecziuns e meinis che secumportien buc exnum cun l’atgna concepziun mundiala. La surdada dil Premi da renconuschientscha a pader Urban ei vegnida enramada musicalmein dil Chor-baselgia
Sogn Gions sut la bitgetta dad Aluis Hosang.

En favur dalla cuminonza
Dabia fortissimo musical ei vegnius il vendergis vargau dallas duas musicas da tscheiver Las Bagordas e las Fifferlottas. Omisduas activas egl intschess communal dalla vischnaunca da Mustér. Lur activitads en favur dalla cuminonza dil vitg ei stau il motiv principal per la cumissiun Premi Desertina da surdar la distincziun da promoziun allas duas musicas da tscheiver. Per cumpleina surpresa dallas musicas sezzas, sco quei che la presidenta da Las Bagordas, Nadia Deflorin, ha exprimiu cun il Premi da promoziun enta maun. Ella ha discurriu dad ina gronda honur per las musicas da tscheiver ed ha plidentau igl engaschi dallas formaziuns en favur dalla convivenza en vischnaunca. Ed aschia prevegnir ad in pregiudezi da sulet definir l’existenza el far fiasta. Surprendentamein ha Kurt Jeitziner satrau quei pregiudezi en sias explicaziuns digl engaschi e dalla historia dallas formaziuns musicalas ed il tscheiver da Mustér en general. El ha discurriu dad ina gronda honur d’astgar tener la laudatio per las duas guggas essend sez staus activs en omisduas formaziuns. Jeitziner ha valetau las formaziuns da tscheiver sco absolut dignas da retscheiver la promoziun communala gest visavi a lur stentas da scaffir cuminonza. Dil temps nua che la populaziun sededicheschi pli e pli alla tgira dall’individualitad ella reit electronica. Plinavon vesa Jeitziner las musicas sco ambassaduras dalla cultura romontscha e dalla vischnaunca da Mustér. E menziunau las numerusas preschientschas musicalas dallas musicas indigenas ordvart la Surselva. E medemamein la representanza indigena ell’uniun tetgala dallas musicas da tscheiver svizras. In’organisaziun che s’identifichescha anoviars en tuts quater lungatgs naziunals. Plinavon vesa Jeitziner las duas musicas da cuminonza cun l’Uniun da tscheiver da Mustér sco ils motors impurtonts dil tscheiver en vischnaunca.

In giuven fenomen en ina liunga tradiziun
En vesta alla liunga tradiziun dil tscheiver ei la musica da tscheiver in fenomen plitost giuven. Per Jeitziner appartegnan Las Bagordas s’etablidas igl onn 1985 e Las Fifferlottas da Segnas dus onns pli tard allas pli veglias formaziuns da tscheiver en Surselva. Las ulteriuras formaziuns da Falera e Glion fundadas 80 ed 82 existien numnadamein buca pli ella fuorma d’antruras, ha Jeitziner getg. La laudatio ei stada enrihida da differentas anecdotas persunalas da Jeitziner ch’han dau perdetga dalla flexibilitad dallas formaziuns en lur engaschi per la communitad communala. Secapescha che la surdada dil Premi Desertina ha buca tralaschau da porscher allas duas formaziuns la pusseivladad da documentar lur habilitads musicalas e quei han ellas fatg a moda perschuadenta.