News-Details

Baselgia claustrala en nova splendur

12.11.2019

DA SUSI ROTHMUND / ANR

Ier ei stau il di da sogn Martin. Sogn Martin ei il patrun dalla claustra e dalla baselgia claustrala a Mustér. Quei ei stau la megliera caschun per consecrar il niev altar grond ella baselgia claustrala renovada. La baselgia claustrala en nova splendur ei stada fullanada tochen sil pli davos plaz ier a caschun dalla reconsecraziun dalla baselgia e benedicziun dil niev altar principal. Il nunzi apostolic dalla Svizra, arzuestg Thomas Edward Gullickson, ei staus il celebrant principal dalla messa solemna. Quella ei vegnida embellida musicalmein dil chor ed orchester dil gimnasi dalla claustra Mustér culla messa d’encoruna ziun da Wolfgang Amadeus Mozart. Suenter in cuort beinvegni entras igl avat Vigeli Monn ha il nunzi dau sia benedicziun all’aua e dau persunalmein, mond tochen oradem la baselgia, la benedicziun allas cartentas ed als cartents, al niev altar ed al niev ambo. Igl ei stau in grond di per la claustra da Mustér.

«Casa da Diu e la porta enta parvis»
Messa solemna e consecraziun dil niev altar ella baselgia claustrala a Mustér

Ils 11 da november ei la fiasta da sogn Martin, el ei il patrun dalla claustra e dalla baselgia claustrala a Mustér. Ier, cul di da sogn Martin, ha ina messa solemna giu liug ella baselgia claustrala renovada e la consecraziun dil niev altar grond entras il nunzi apostolic dalla Svizra, arzuestg Thomas Edward Gullickson, ch’ei staus il celebrant principal. Suenter in temps da restauraziun e da baghegiar da rodund quater onns resplenda la baselgia claustrala a Mustér uss endadens ed ordado en cumpleina tarlischur. Egl intern para ei enzaco «tut auter», mo igl ei la veglia tarlischur ch’ha puspei pudiu vegnir alla glisch. Cartents da lunsch e da maneivel – denter els era numerus hosps envidai –
han empleniu ier la baselgia claustrala tochen sil pli davos plaz. Pil di dil patrun baselgia – sogn Martin – e strusch dus onns suenter las empremas lavurs da restauraziun egl intern – ha la baselgia da sogn Martin pudiu vegnir reconsecrada. (La Quotidiana ha rapportau dalla restauraziun la mesjamna, ils 6 da november 2019.) Igl altar niev ord marmor alv el sectur sacral ha attratg l’egliada dils presents ch’han saviu assister alla benedicziun da tal. La messa solemna ei vegnida embellida musicalmein dil chor ed orchester dil gimnasi dalla claustra Mustér culla messa d’encorunaziun da Wolfgang Amadeus Mozart. Suenter in cuort beinvegni entras igl avat Vigeli Monn ha il nunzi dau sia benedicziun all’aua e dau persunalmein, mond tochen oradem la baselgia, la benedicziun als cartents, al niev altar ed al niev ambo.

Ina scala enta parvis
En siu priedi ha il nunzi numnau la claustra dils benedictins in liug da veta, da lavur ed oraziun tenor la regla da s. Benedetg. Quella seigi en moda speciala in liug dalla vera veneraziun da Diu el spért ed ella verdad. La baselgia claustrala seigi per nus ina scabella nua che Diu il tutpussent possi metter sissu ses peis amiez il pievel. «Nus sperein ch’ils aunghels anflien era cheu ina scala, sin la quala ei san sesalzar en tschiel e puspei turnar engiu per realisar lur survetsch en favur dils carstgauns el Grischun», ha igl arzuestg rugau e cuntinuau: «Nus sperein che quella venerabla casa da Diu possi esser en nies temps in monument da crap, quintaus per quella regiun e quei temps.» Siu priedi ha il nunzi concludiu culs plaids dil patriarc Jacob: «Con pleins da veneraziun ei bein quei liug! El ei nuot auter che la casa da Diu e la porta enta parvis.»

Reliquias egl altar
Tenor in’oraziun tier Diu duei igl altar niev daventar in liug nua ch’ils misteris da nies spindrament vegnan realisai. Cheu duei il pievel purtar sias donaziuns ed oraziuns e ludar Diu, il scaffider e donatur da tut il bien, cun cor engrazieivel. Tier igl act festiv ha era la «sepultura» da reliquias el miez dil plat digl altar s’udiu. El baul cristianissem vegnevan baselgias ed altars savens construi sur las fossas da marter(a)s. Quei era denton buca pusseivel tier tut las baselgias ed aschia ei igl usit da «schar en» reliquias els altars naschius. Egl altar niev dalla baselgia claustrala ha il nunzi Thomas Edward Gullickson schau en reliquias da s. Sigisbert, s. Adalgott e da fra Clau da Flia. Suenter in’oraziun da benedicziun ha il nunzi dau l’uncziun cun crisam ed entras quella ei igl altar daventaus il simbol da Cristus. Era tier in batten vegn mintga carstgaun «unschius» cun crisam. Sin mintga cantun ed el miez digl altar ei vegniu repartiu cuppas cun entscheins. Ils tschun loghens – nua ch’igl entscheins ei vegnius barschaus – duein regurdar allas plagas da Cristus. Il bien fried digl entscheins duei sesalzar tier Diu, quei sco segn che Diu beneventi las oraziuns dils cartents. La finfinala ei igl altar principal vegnius cuvretgs cun ina teil’alva. Quella teila muossa che l’eucaristia po vegnir festivada. La teila sigl altar sereferescha era alla cozza da meisa dils carstgauns che decoreschan cun ella la meisa sch’ei dat ina tschavera festiva. Allura ein las candeilas sigl altar niev vegnidas envidadas per l’emprema ga. Ellas fan attent a Cristus sco «la glisch dil mund».