News-Details

Pigns e gronds ein stai alla fiera sogn Martin

12.11.2019

DA SUSI ROTHMUND/ANR
Ier ha la tradiziunala fiera da sogn Martin giu liug a Mustér e numerus Sursilvans e hosps han gudiu la purschida e las sentupadas. Enqualin ha franc era cumbinau la messa da reconsecraziun dalla baselgia dalla claustra cun far silsuenter ina viseta alla fiera el vitg claustral. Quei havein era nus fatg, mo ch’ei ha stuiu ir pli dabot che giavischau ni usitau per che fotografias e text cumparien en la gasetta dad oz. Aschia san era quels ch’han buca saviu esser presents far in maletg dalla purschida varionta e dils varga 40 stans cun marcadonts da Mustér, dalla regiun, dallas Vals talianas ed era da pli lunsch naven. Sto esser ch’ei plai era als marcadonts e ch’ei san far gnanc aschi malas fatschentas, pertgei ils biars ein da veser leu onn per onn.

Da petta tochen vinars
Petta, maruns, termagls, paun, ligiongias, caschiel e vinars ein mo entgins dils artechels ch’ils visitaders dalla fiera da sogn Martin han saviu cumprar ier. Tgi ei iu dalla via si e giu plitost mo per marveglias e tgi ha schau giavinar dils buns friads e da vendidras e vendiders curteseivels. Entgins han perfin gia entschiet a cumprar ina ni l’autra caussa per regalar a caras persunas sin Nadal. Vinars e mèl d’aviuls, ischiu special ni ina buna ma gnucca laian gie tener senza problems tochen lu – num che las queidas seigien memia grondas. Mo era gliez fuss strusch in problem, pertgei la gronda part dils marcadonts ei era presenta ad ina ni l’autra fiera d’advent – empau pli cuort avon Nadal. Els ein denton pli u meins tuts era aschi moderns ch’ei han ina pagina d’internet. La gronda part perfin cun in online-shop nua ch’ins sa empustar dafertontier quei ch’ins drova ed aschia era sustener il commerci regiunal.