News-Details

Suenter No10 suonda No11

21.01.2020

DA HANS HUONDER / FMR

Entochen igl avrel sepresenta il cabarettist Rolf Schmid aunc cun siu program No10 per siu giubileum da 25 onns preschientscha sin tribuna. Silsuenter duei ei dar in ulteriur program, probabel igl onn 2021. Cun siu program No10 ei Rolf Schmid sepresentaus ils davos dus onns pressapauc 120 ga ell’entira Svizra. Era en Surselva eis el staus presents cun quel quest unviern, numnadamein denter Nadal e Daniev a Falera ed il venderdis sera a Mustér. Era en quei program ei il cabarettist ch’habitescha a Giuvaulta staus fideivels a ses principis. Sgnoccas e historias raquintadas senza firlefanzas e cun in humor grischun. Aschia la historia da si’allergia da sgugialar, il priedi digl uestg ni ils schabetgs sempels el tenercasa. Era a sia presentaziun a Mustér ei Schmid ius cun ses giugs da plaids al cunfin dalla cumedia ed il humor ner. El ha denton era buca tralaschau da menar discuors cun aspectaturas ed aspectaturs e per part ha el priu quels pulitamein silla corna. Suenter la presentaziun ha Schmid priu persunalmein cumiau all’extrada da mintgina e mintgin dils 110 visitaders dalla presentaziun. In bi gèst.

In ulteriur program

Il program No10 pil giubileum da 25 onns da preschientscha sin tribuna duei buc esser il davos da Schmid: «Nus vegnin a luvrar gia spert puspei vid in program niev. Jeu quentel che quel seigi lu madirs igl onn vegnent.» Il program prepara el culla medem’equipa, en special cun Hardy Hemmi. Cun el cooperescha Schmid dapi 20 onns: «Cura che bia ideas ein naschidas mein nus per in’jamna en ina tegia d’alp a Cunclas. Leu vegn lu mulau vid las sgnoccas e historias. Il clima sto esser buns, nus stuein haver buna luna, mo lu daventa in program perfetgs. Si d’alp essan nus persuls e savein luvrar sco nus lein, era entochen tard la
sera.» Biaras ideas neschien a casa, mo lu era el spazi public sco per exempel en stizuns: «Magari vegnan schabetgs da pli baul endamen e fuorman lu la basa per ina buna numera.» Per preparar in entir program seigien rodund otg meins necessaris. «Leutier s’auda buca mo il svilup da mintga singula numera, mobein era emprender ordadora quella inclusiv la coreografia. Mintga plaid ha da seser», di Schmid ch’ei dapi 21 onns cabarettist professiunal. Ins astga esser spanegiaus sin siu program niev, igl endischavel.