News-Details

Colligiaziun denter Mustér e Curaglia interrutta

07.10.2020

«Quei sa ir plirs dis»

Avon in onn, ils 28 d’uost ei la via dil Lucmagn stada interrutta plirs dis pervia d’in sbuadetsch ellas Ruinas. Pervia d’in plattiu ch’ei sesligiaus el Tuf e ch’ei curdaus cun auter material silla via ei la colligiaziun denter Mustér e Curaglia danovamein interrutta. Ils geologs ein vidlunder da survigilar il terren rodund 50 meters sur la via cantunala. Ier avonmiezdi havevan els constatau ch’il terren ei seruschnaus vinavon. Sco quei ch’igl Uffeci da construcziun bassa ha communicau ier, ein rodund 1500 cubics seruschnai ella vallatscha dilTuf e silla via dil Lucmagn. Ei seigi en in liug che valevi entochen oz sco nunproblematics. La via ei curclada dapresent cun gronds blocs da tochen 100 meter cubics, ella ei denton buca donnegiada. Mardis-sera han ils geologs installau il sistem da survigilar e mesirar il terren instabil. El contuorn nua che la platta gronda ei sesligiada seigien aunc rodund 1000 cubics en moviment, scriva gl’Uffeci da construcziun bassa. La vischnaunca da Medel ha daferton organisau in transport da persunas denter Mustér e Curaglia sur las vias localas. Biars circuleschan dapresent cugl e-bike. Gl’eveniment ei schabegiaus rodund 150 meters avon il tunnel da Mumpé Medel. Il passadi da Curaglia e Mumpé ei pia buca pertuccaus. In bus va da Mustér a Fontanivas. Da leu ston ils passaschiers ir a pei dalla via veglia si encunter Mumpé. Leu parta in bus pign enta Curaglia. Rico Tuor, il president communalda Medel, ha accentuau ch’ei seigi sulettamein ina sligiaziun per persunas ch’ein bein sin combas. Glieud giuvna mondi il tschancun da Fontanivas entochen Mumpé en in quart d'ura. Wendelin Jacomet, il gerau dil baghegiar-e stradalesser dalla vischnaunca da Mustér habitescha a Mumpé. Sco el ha detg sin damonda dalla FMR, ein ils cass da curdada da crappa e bovas s’accumulai ils davos onns, la via seigi serrada pli e pli savens. Perquei spera el ch’il cantun fetschi vinavon silmeins cul project dalla punt pendenta pil traffic plaun ch’ei projectada. Pil selvicultur da Mustér Simon Cathomen ha gl’aquaduct actualmein la gronda prioritad. La dracca dil venderdis sin sonda hagi buca mo periclitau las vias mobein era il provediment d’aua. Pil mument retrai la vischnaunca aua sulettamein dallas tschaffadas ella Val Segnas.

Info "link" situaziun vias en vischnaunca