News-Details

Previu in gudogn malgrad reducziun dil pei da taglia

12.11.2021

Hans Huonder/FMR

Ils 26 da settember 2021 ha il suveran da Mustér decidiu da sbassar il pei da taglia communal per diesch pertschien sin 110%. La suprastonza communala haveva proponiu ina reducziun da sulettamein tschun pertschien. Sin fundament da quella decisiun ha ei giu num far il preventiv e sco ei para, reussescha ei da tener en rama las finanzas communalas malgrad quella reducziun. En in’jamna sefatschenta il cussegl da vischnaunca dil preventiv communal pigl onn 2022.

Previu in avanzament

Il preventiv dil quen da gudogn e sperdita quenta cun in surpli d’entradas da 330 000 francs tier ina sviulta da rodund 16 milliuns francs. En cumparegliaziun cul preventiv precedent sereduceschan las expensas totalas per 2,3% e las entradas per 1,8%. Il preventiv pigl onn current quenta cun in gudogn da pressapauc 250 000 francs. La suprastonza communala quenta pigl onn vegnent cun in’atgna finanziaziun da biebein in milliun francs, il preventiv da quest onn quenta cun in tal da rodund 100 000 francs pli pauc. Las investiziuns nettas previdas igl onn 2002 muntan 7,77 milliuns francs. «Cull'introducziun dil niev plan da finanzas havein nus scaffiu in impurtont instrument strategic, mintgamai pils proxims diesch onns. Tenor lez fuss ei previu da contonscher in cash-flow dad 1,7 milliuns francs igl onn 2022. Sin fundament dalla decisiun da sbassar il pei da taglia per diesch pertschien ei quella calculaziun pigl onn 2022 memia optimi-stica. Cun risguard dallas meins entradas dalla reducziun dil pei da taglia quintein nus el plan da finanzas cun in cash-flow dad 1,45 milliuns francs», scriva la suprastonza communala el messadi per mauns dil cussegl da vischnaunca. Effectivamein quenta il budget denton cun in cash-flow da 1,065 milliuns francs. La finamira dil plan da finanzas da contonscher in cash-flow po buca vegnir contonschida dil tut. «Sin fundament dallas circumstanzias vegnin nus datier da quella finamira», puntuescha il president communal René Epp. Ed el cumpletescha: «Nus essan repassai mintga posi-ziun e desistin era d’eventualas reservas, quei che fa il preventiv avon maun fetg realistics.» Quei bien resultat seigi pusseivels malgrad ina reducziun dil pei da ta-glia e novas plazzas tier l’administraziun, respectiv il menaschi tecnic.

Pign spazi per eveniments specials

Il gudogn ch’il budget preveda astga denton buca tschorventar. In gudogn da rodund 330 000 francs el quen da gudogn e sperdita lubescha numnadamein negins eveniments specials sco igl ei per exempel stau il cass igl onn vargau culs donns dallas malauras. «El preventiv pigl onn 2021 havevan nus quintau cun in gudogn da rodund 600 000 francs. Gia ella tractaziun da quel igl atun 2020 dil cussegl da vischnaunca han las empremas correcturas stuiu vegnir fatgas, per exempel sin fundament dils gronds donns caschunai dallas malauras igl atun 2020. Quels persuls han pretendiu ina correctura dil preventiv da rodund 300 000 francs», di il canzlist communal Andri Hendry. Vul dir: «Dat ei in schabetg en quella dimensiun ei in eventual gudogn lu spert buca pli realitad.» Il preventiv 2022 ei vegnius calculaus fetg realistic: «Ei era adina empau la tendenza da far preventivs precauts, gie bunamein pessimistics. Nus empruein veramein da luvrar fetg exact cullas cefras che nus spitgein.» Correcturas dat ei era buca pertuccont eventualas meinsentradas davart l’influenza dalla pandemia. En quei grau seigien ins suandaus las cusse-gliaziuns dil cantun, respectivamein dallas instanzas da taglia.

Grondas investiziuns

Igl onn vegnent preveda la vischnaunca da Mustér da far investiziuns nettas da 7,77 milliuns francs. En cumpareglia-ziun cul plan da finanzas eis ei previu d’investar pressapauc dus milliuns francs dapli. Igl ei numnadamein previu d’inve-star 900 000 francs dapli el Center Fontauna. Da l’autra vart eri ei buca vegniu risguardau el plan da finanzas la davosa etappa dils indrezs d’ennevar dalla descensiun Caischavedra - S. Catrina da 500 000 francs. «Entras la projectaziun detagliada dils davos meins eis ei ulteriuramein vegniu budgetau ina summa da 900 000 francs per in niev project per l’economisaziun da rumien a Raveras, ch’ei enviers il plan da finanzas per 250 000 francs pli aulta», scriva la suprastonza communala. Budgetadas ein ulteriuras investiziuns ch’eran buca previdas, sco per exempel il project dil surpassadi dalla staziun dalla Viafier Matterhorn Gottard a Segnas per rodund 250 000 francs ni era la realisaziun da parcadis a Segnas sco era ad Acla da Fontauna per rodund 140 000 francs.