News-Details

Clar GIE alla reducziun dil pei da taglia

04.03.2024

 

La decisiun pertuccont la reducziun dil pei da taglia da 110 sin 99 % ei curdada cun 726 GIE encunter 216 NA. Quei ei la secunda reducziun dil pei da taglia enteifer dus onns. Pigl onn 2022 era el vegnius sbassaus da 120 sin 110 %. Cun quei ei il suveran suandaus la proposta dil cussegl da vischnaunca. La suprastonza communala haveva giu proponiu al parlament da far reducziuns en etappas da mintgamai dus pertschien entochen sin 98 %. Pil president communal René Epp ei quella decisiun buca ina surpresa: «Na, quei ei negina surpresa, mo tuttina fa il resultat fetg clar surstar. La gronda participaziun da rodund 65 % alla votaziun muossa ch’il pei da taglia ha ina grond’impurtonza en vischnaunca. Ussa essan nus pretendi da priorisar las investiziuns e da tener sut controlla las expensas. Mo lu era d’empruar da generar novas entradas per saver finanziar il svilup. La purschida d’ina vischnaunca ei igl a ed o, mo era il pei da taglia gioga en quei connex ina rolla.»

Cun 687:194 ha ei era dau in clar GIE per la revisiun parziala dalla planisaziun locala pertuccont l’explotaziun da crappa a Mumpé Medel/Ragisch. Cun quella decisiun ha il suveran scaffiu la basa per cuntinuar cull’explotaziun da crap scalegl sut il vitg da Mumpé Medel. Dapi onns vegn gia explotau leu crappa, senza ch’il territori havess denton giu persuenter la basa legala ella planisaziun d’utilisaziun dalla vischnaunca da Mustér. (fmr/hh)