News-Details

Las empremas famiglias ucrainas bandunan Mustér e secasan a Cuera

18.07.2022

Hans Huonder/FMR

Ils 24 da fevrer 2022 ein truppas russas marschadas ell’Ucraina. Dapi lu regia uiara en parts dalla tiara, surtut egl ost. Milliuns persunas, oravontut dunnas ed affons, han fatg la fuigia dapi lu. Biars ein semess sin via en direcziun vest e han per part era avisau e la fin finala contonschiu la Svizra. Ladinamein suenter che l’uiara ei rutta ora ein seformadas gruppaziuns ell’entira Svizra che han organisau acziuns per rimnar daners, rauba e victualias pils pertuccai. Aschia era a Mustér. La gruppa cul num «Solidaritad cull’Ucraina» ha arranschau denter auter concerts da beneficenza a Mustér e Falera. Bia glieud ei separticipada e ha prestau donaziuns generusas en favur dallas famiglias en pitgiras. Grazia a quei sustegn ch’ei vegnius cumpletaus d’ulteriuras acziuns eis ei stau pusseivel da procurar spert pil pli necessari, en emprema lingia per ina gruppa da biebein 50 persunas ch’ei arrivada paucas jamnas suenter l’entschatta dall’uiara a Mustér. Tut en tut setracta ei da 14 famiglias cun 41 affons.

Negin retuorn en vesta

Dapi prest quater meins ha la gronda part da quellas famiglias dimora en ina dallas casas dil Catrina Resort a Mustér. Ulteriuras famiglias han survegniu dimora a Rueras e Danis. Damai che negin sa con ditg che l’uiara cuoza e cura ch’ils fugitivs san returnar en lur patria, sto la scolarisaziun dils affons succeder. «Ella scola populara a Mustér eis ei buca pusseivel da porscher quei survetsch. Quei ei memia biars enina e damai che praticamein gnanc in sa tudestg, eis ei stau necessari da cattar ina soluziun cullas instanzas cantunalas», di Simon Camartin ch’ei alla testa dall’acziun «Solidaritad cull’Ucraina» a Mustér. En contact cullas autoritads communalas ed ils uffecis pertuccai dil cantun Grischun ei vegniu purschiu allas famiglias la pusseivladad da secasar ella regiun da Cuera: «En in’emprema fasa san ils affons vegnir instrui leu da scolastas e scolasts dall’Ucraina. Gest tenor svilup ch’els fan, san els lu vegnir integrai successivamein ella scola populara. Igl ei aschidadir in process rullont tenor savida.» Sco quei che Simon Camartin ha detg enviers la FMR, vegnan las empremas famiglias a bandunar Mustér quest’jamna. A Cuera survegnan ellas suttetg en habitaziuns affittadas dil cantun.

Entginas famiglias restan

Entochen miez uost vegn la gronda part dallas famiglias dalla gruppa, inclusiv quellas che habiteschan il mument aunc a Rueras e Danis, ad haver bandunau la Surselva. Quater famiglias cun tschun affons, da quei quater obligai da frequentar la scola populara, restan a Mustér. Igl ei affons che san vegnir integrai bein tenor lur annadas ella scola populara. Damai che la casa dil Catrina Resort ch’ei occupada il mument culs Ucrains sto star a disposiziun sil pli tard igl unviern pil turissem, vegn ei ad esser necessari da tschercar habitaziuns per las famiglias che restan. «Gest tenor basegns e giavisch segida la vischnaunca cun quellas famiglias d’anflar ina dimora cheu tier nus», sincerescha il president communal René Epp. Sper ils quater affons da quella gruppa frequentan sis ulteriurs affons ucrainais che habiteschan en vischnaunca medemamein la scola igl atun a Mustér. «Integrar quels diesch affons ei bein pusseivel. Per pli biars havess ei denton buca tunschiu tier in menaschi da scola cun rodund 200 affons. Scolarisar tuts affons fuss stau nunpusseivel e per quei motiv essan nus leds e cuntents ch’igl Uffeci da migraziun dil cantun Grischun ei segidaus per anflar soluziuns a Cuera», puntuescha René Epp. Cun integrar diesch affons el menaschi dalla scola populara fetschi la vischnaunca da Mustér il pusseivel.