News-Details

Prest negina stizun da calzers pli ella Cadi?

22.07.2022

SUSI ROTHMUND/FMR

Giusep Caduff ha bugen il contact culla glieud ed el ha plascher da calzers, suenter la lavur gauda el bugen in migiel vin e manegia perquei: «La stizun da calzers e vin ei stau la dretga via per mei. Ussa sun jeu denton gleiti 70 ed igl ei uras da calar.» Sch’ei mass mo suenter el, luvrass Caduff probablamein aunc ditg e survess di per di la clientella en sia stizun alla Via Alpsu a Mustér. Sco el di ein sia dunna ed ils fegls denton digl avis ch’ei fussi uras da guder la pensiun. «Mia stizun da calzers ei ina purschida che vegn appreziada d’indigens e hosps, ei fuss donn da semplamein serrar las portas. Perquei sun jeu alla tscherca d’ina successura ni d’in successur», tradescha igl um che ha prest 68 onns ed aschunta ch’el fussi secapescha era promts da surdar la fatschenta avon siu 70avel. La representanza da vin vul el salvar, quella seigi dapi 80 onns en famiglia. Ina ga ch’el fuss lu pensiunaus vul el guder la libertad e pendular pli savens denter Mustér e l’Austria. Ella patria da sia dunna Hilde tuorni el bugen per guder la cuntrada senza cuolms e las bunas spisas.

Dalla cazzetta tiels calzers

Il 2000 ha Giusep Caduff surpriu la stizun da Calzers Rico che sesanflava visavis il Hotel Alpsu. «Quei ei stau ina decisiun spontana – ina casualitad», seregorda igl um che ha empriu da cuschinier. El era in cuschinier pissiunau ed ei staus a luvrar en hotels a Tavau, Zermatt, Genevra, mo era en Engheltiara ed auters loghens. «Aschia hai jeu viu ed empriu in tschuat», di igl um che discuora (almeins) sis lungatgs. El ha in’affinitad per lungatgs e cugl agid da conluvreras e conluvrers eis ei iu tgunsch d’emprender franzos, engles, talian, spagnol, mo era empau portughes ni croat e serb. Pigl um da famiglia era il mistregn dil cuschinier denton buc ideals e per haver dapli temps pils ses fuva el alla tscherca d’ina soluziun. Quella ei vegnida en fuorma dalla stizun da calzers e Giusep Caduff ei mai staus mal d’haver priu quella via che ha propi da far gnanc tec cul cuschinar. Diltut ha el denton buca calau ed ei adina puspei staus a gidar ora en differentas cuschinas, per exempel ellas casas d’attempai a Sedrun e Mustér. Lu mirava sia dunna Hilde dalla stizun ch’ei han dislocau suenter enzacons onns da l’autra vart dalla via. «Jeu hai empriu tut cun far ed a moda autodidacta. Sch’jeu fuss aunc giuvens emprendessel denton da calger ni ortoped, quei ein mistergners tschercai», puntuescha il vendider da calzers e vin che vegn savens era numnaus «il calger».

Calzers vegans

Dalla moda actuala da purtar tschappas cun vestgius tegn Giusep Caduff plitost pauc: «Quei ei negina cultura! Tier in bi vestgiu s’auda in bi calzer. A caschun da fiastas astga il stil buca muncar.» Da luvrar porta el sez denton era tschappas, alla lavur stoppien ils calzers esser funcziunals, comfortabels e cumadeivels. En sia stizun ei l’elecziun gronda e tonscha da sandalas per pops entochen tier calzeruns per ir per la pézza. Cu el cumpra en sia collecziun duas ga ad onn mira Caduff plitost silla qualitad e funcziunalitad che sils davos trends da moda. Per ina stizun da quella grondezia mondi ei buca dad ir mo suenter la moda. «Mira, quellas sandalas hai jeu dapi 15 onns el sortiment», di el. Allura pren el giud cruna in calzer empau pli special e declara ch’ei setracti da calzers vegans, pia diltuttafatg senza material gudignaus d’animals. Quels seigien actualmein il hit, oravontut tier las giuvnas. Ils calzers da Caduff plaian denton a biars e biaras e la clientella vegn era d’auters vitgs dalla Surselva. Duront las sesiuns da vacanzas ha «il calger» bia clientella da tuttas naziuns ed era hosps da vacanzas che tuornan adina puspei. Ils hosps da vacanzas smarveglian ch’el sa tons lungatgs e gaudan da dar ina paterlada. «Ils crocs level jeu atgnamein prender ord il sortiment, mo ei ha adina da quels che damondan suenter», di Giusep Caduff e sco sch’ei fuss fatg giu vegn pauc pli tard in giuven turist en fatschenta. Ses calzers da stad ein ruts ed el enquera urgentamein crocs.

Calzers tradeschan il caracter

Sco il dentist sils dents, mira «il calger» il pi emprem sils calzers. «Sch’jeu entaupel enzatgi ni sch’enzatgi entra en stizun mirel jeu a moda discreta sils calzers, quels tradeschan il caracter dalla persuna», eis el perschuadius. Ei detti persunas cun calzers tut ruts e tschufs, tier quels magliassi el buca bugen ina tschavera. Cun tuffien da peis vegni el perencunter buca confruntaus stedi. Silpli enqualga tier mattas giuvnas che portien calzers ord materials artifizials. «Quei sa vegnir siado las dètgas undas», manegia el e ri.