«Quei ch’jeu vesel, audel e sentel»

Il pictur-artist Linus Flepp arva ina nova e gronda gallaria d’art el vitg da Mustér. En ina part da quella muossa el sias ovras, en in’autra dat el era la pusseivladad d’exponer ad autras artistas ed artists. Pil vitg da Mustér ei quei in’attracziun per interessents digl art, mo era scolas, indigens e turists.

Hans Huonder/FMR

Aunc impedeschan gardinas la vesta ella part dalla gallaria cun ovras da Linus Flepp alla Via Alpsu a Mustér. Ils 11 da november 2023, suenter miezdi, duei quei semidar. Lu arva il pictur-artist las localitads ch’el ha saviu acquistar per mussar in tschuppel da sias ovras. Naven da lu ei la gallaria aviarta mintgamai la mesjamna, il venderdis e la sonda suentermiezdi ni tenor cunvegnientscha. Gest dasperas – medemamein ella Casa Mazzetta – dispona Linus Flepp d’in ulteriur local. En quel muossa el atgnas lavurs, mo lu era lavurs d’autras vischinas ed auters vischins da Mustér e d’ordeifer. Quella stanza spaziusa stat a disposiziun era igl avegnir sco liug d’exposiziuns ambulontas.

Encuretg ed anflau

«Jeu erel alla tscherca da localitads per deponer ni exponer mes maletgs. Lu ei sedada casualmein la caschun da cumprar las localitads el plaunterren dalla Casa Mazzetta», di Linus Flepp (70) ch’ei oriunds da Curaglia, mo che viva dapi rodund 50 onns a Mustér. Igl anteriur scolast primar dispona dapi 23 onns d’in atelier ella casa da scola a Segnas: «Leu ha la vischnaunca plans e per quei motiv hai jeu stuiu tschercar tec a tec ina soluziun. Igl atelier resta denton leu il proxim temps.» Ella Casa Mazzetta posseda Linus Flepp sis stanzas, per part fetg spaziusas. Las biaras da quellas surveschan per exponer ses maletgs. Tut en tut ein da veser rodund 40 ovras da different format: «Quei ein tut maletgs ch’jeu vendel buca. Els ein denton cheu e mintgin sa vegnir a mirar els, filosofar e discussiunar.» Ella gallaria maunca denton era buc in’exposiziun da sias bein enconuschentas caricaturas, ch’ein da veser regularmein denter auter mintga di silla davosa pagina da La Quotidiana.

«Quei ch’jeu vesel, audel e sentel»

Linus Flepp malegia mintga di quater entochen tschun uras. Sch’el lavura buca vid caricaturas cun cuntegns per gronda part actuals, malegia el cun ieli sin teila. En in cudischet davart el ch’ei cumparius avon exactamein 20 onns scriva Linus Flepp: «Quei ch’jeu vesel – quei ch’jeu audel – quei ch’jeu sentel – tut cula viaden en mes maletgs.» Quei ei buca semidau e cun broschuras per affons e carschi emprova Linus Flepp d’intermediar il cuntegn da sias ovras al contemplader. Quei fa el en ina fuorma figurativa e da giug per affons e cun texts tier entginas ovras exponidas ella gallaria nova: «Per mei persunalmein eis ei impurtont che la glieud emprovi da capir quei ch’jeu less dir cun mes maletgs. Jeu caracteriseschel memez empau sco in pictur scribent. Jeu sentel che bia glieud ha plascher da quei.» Da veser ella gallaria ein dil reminent era entginas sculpturas da metal da Linus Flepp. Quellas ha el scaffiu en collaboraziun culla Fravia Bundi a Mustér.