Cartas dil di
Informaziun davart sistida
Las Viasfier federalas svizras vegnan naven dils 1-1-2024 buca a cuntinuar cun la vendita dallas cartas da viagiar dil di per vischnauncas ella fuorma dils davos onns. La fuorma d'ina semeglionta carta ei vegnida presentada l'entschatta fevrer 2023 alla publicitad.
Igl abonnament dalla vischnaunca da Mustér per las duas cartas da viagiar dil di scada cun la fin da mars 2023 ed igl ei buca pusseivel da prolungir igl abonnament sulettamein pils nov meins restonts entochen la fin 2023. Per garantir la purschida stuess la vischnaunca acquistar in abonnament pigl entir 2023, quei che caschunass in deficit da plirs mellis francs.
Sebasond sin quella situaziun ha la direcziun communala decidiu da sistir naven dils 1-4-2023 la vendita dallas cartas da viagiar dil di. Gest tenor situaziun vegn eventualmein decidiu da cuntinuar 2024 cun la nova purschida d'ina carta dil di da spargn.
La carta dil di dalla vischnaunca ei ina purschida dalla vischnaunca. Quella carta saveis Vus duvrar per viagiar cun quasi tut ils mieds da traffic publics en Svizra (p.ex. tren, auto da posta, tram, bastiment). Naven digl 1. d'avrel 2021 ei la vischnaunca en possess da 2 cartas dil di per la secunda classa. Ina midada da classa ei pusseivla, igl alzament sto denton vegnir pagaus al spurtegl. Empustar la carta dil di san ins entochen in onn ordavon. Per tarmetter la carta cun posta vegn quintau frs. 5.-- spesas. Brattar ni returnar cartas cumpradas ei buca pusseivel.
Impurtont!!
Per prevegnir ad in maldiever da quella purschida, supplichein nus Vus da retrer la carta duront 5 dis suenter Voss'empustaziun. Cartas reservadas vegnan buca annuladas ni restituidas. Sche la carta vegn reservada e buca retratga, vegnan ils cuosts caschunai tschentai a quen.
Ils cuosts per ina carta dil di muntan a frs. 45.--/carta. Plinavon vegn la vendita dallas cartas restrenschida sin persunas domiciliadas en Surselva.
Nus supplichein da risguardar nos temps d'avertura cheusut.
| Gliendisdis | 0830 - 1130 | 1500 - 1830 |
| Mardis - gievgia | serrau | 1500 - 1730 |
| Venderdis | 0730 - 1400 | serrau |