News-Details

Sentupada intercontinentala el gimnasi a Mustér

05.07.2017

Il gliendisdis vargau ei ina gruppa da students ed accumpignaders ord il marcau principal dall’Africa dil sid Kapstadt, dalla Westerford High School, arrivada el gimnasi dalla claustra da Mustér. Gia la mesjamna ei lur viadi cuntinuaus viers differentas staziuns atras l’Europa. Alla staziun da Mustér ei in viadi da sur quendisch uras ius a fin per ils giuvenils ord la gronda metropola africana. Per l’emprema fotografia ein els sepostai avon ils placats cun l’inscripziun «Der Weg nach oben» e «Towards the ultimat». Per ils Africans dil sid hai giu num – el senn dil plaid – d’ascender las scalas e la via teissa che meinan viers la claustra.

Sentupada cordiala

Leu ein els beinspert vegni salidai dils students gimnasials. Tgi che ha astgau contemplar il beinvegni ha giu l’impressiun che buns amitgs enconuschents s’entaupien. Tier ils giuvens students succeda il prender si contact a moda spontana, aviarta e cordiala. Denton, dil tut nunenconuschents eran els buc. Duas giuvnas dil gimnasi da Mustér ein stadas duront treis jamnas a Kapstadt el rom dil scomi dils gimnasis da Mustér e Westerford. Tals scomis vegnan organisai dalla societad «Eduglobe Swiss», la quala ei domiciliada el menaschi dalla claustra da Mustér. La giuvna Sina Darms da Glion ei stada leu ed ha saviu far beinvegni als enconuschents da Kapstadt. Las duas studentas Saskia e Megan prendan ussa dus dis dimora tier Sina a Glion. Dad ellas havein nus vuliu saver tgei impressiun ch’ellas hagien en emprema vesta dalla Svizra. «Beautiful, amazing» hai tunau, las muntognas aultas han fatg ad ellas impressiun e cunzun las auas schubras dils lags da Turitg e Rivaun e dil Rein ein curdadas ad ellas en egl. «Tier nus ein las auas brinas e tschuffas.» La metropola da Kapstadt ei situada entuorn la muntogna Tafelberg e cunfina dall’autra vart cun la mar. El center ein ils sgrattaneblas ed ella periferia las hettas dalla glieud paupra e da quella dat ei fetg biara ell’Africa dil sid. Quei seigi restonzas dalla politica da pli baul che separava ners ed alvs. El temps dad oz vivien las differentas culturas en cuminonza senza sentiments da separaziun. «En nies chor contan tuttas gruppas culturalas ensemen, mo alla fin dil cant van ils paupers anavos els slums ed ils beinstonts en lur casas.» Schebein ellas lessien allura viver en Svizra lein nus saver. «Na, na cheu ei tut reglau e schuber e cunzun segir. Tier nus stuein nus schon far adatg nua che nus mein. Nus stuein lutgar per contonscher enzatgei e cun tener la dira savein nus raccoltar il success garegiau.» Lur impressiun ei quella ch’ils Svizzers survegnien il success senza gronds sforzs. Quell’impressiun vegn aunc pli clara ella cuntinuaziun dil discuors. Tgei fan ils giuvenils che san buca frequentar ina scola gimnasiala e scol’aulta ell’Africa dil sid? Tier quella damonda vegnan las giuvnas pensivas e targlinan. Bein survegnan ils talentai e paupers subsidis dil stadi per studegiar, ils meins talentai denton han buca la pusseivladad dad emprender in mistregn. «L’economia ei en nossa tiara buc aschi ferma ch’ei fuss pusseivel da dar lavur a tuts. Nus havein ina gronda cefra da disoccupai e quels giuvens associeschan bugen cun las bandas criminalas. Sina, la studenta da Mustér, raquenta da sias impressiuns a Kapstadt. Ir a scola en uniforma ei stau per ella dil tut ina nova experientscha. La scola da Westerford cun sur 900 students ei strusch surveseivla. La mischeida da differentas culturas san ins percorscher entras ina buna convivenza etnica.

«boring» – lungurusa seigi la veta en Svizra

Sil plaz sut las gliendas nua che nus havein priu plaz sederasa uss il fried dalla carn grillada. Dalla Svizra enconuschan ellas la buna tschugalata, la Toblerone seigi la pli gustusa aber era fetg cara. Insumma seigi la veta cara en Svizra. Saskia manegia ch’ella savessi cumprar biaras casas ell’Africa sch’ella savessi luvrar en Svizra. Nus havein cumparegliau ils cuosts d’in menu da 25 francs tier nus, quel cuosta a Kapstadt silpli 180 rands ni dudisch francs. Lessan ellas lu pli tard vegnir en Svizra? Gie, sin viadi ni sin viseta. Denton luvrar vulan ellas buca cheu. Megan studegia lungatg engles e vul daventar scribenta e pedagoga e Saskia studegia musica per saver cantar ed ir pil mund entuorn. Per cattar in amitg denter ils students ein ellas era buc el dretg liug. Ellas prefereschan in Franzos pervia dalla biala pronunzia che lez hagien.

Las finamiras dad Eduglobe paran da tschaffar ragischs. Il brat intercultural cun China, cun l’Africa dil sid e Namibia ei sin buna via. Il menader dalla societad, Ursin Defuns, enconuscha ils obstachels sin via al success. El ei denton era quel che tegn la dira e lavura cun engaschament per contonscher finamiras da success.