News-Details

Dils 6 da mars 1799 e d’andutgels engulai

05.07.2017

Las dertgiras circuitalas ein abolidas, mo lur documents ein bein conservai. Igl archiv dil cumin dalla Cadi che sesanfla en casa da scola Cons a Mustér ei in ver scazi ed ils protocols en quel resplendan ina part dalla historia dalla regiun. Denter auter ei da cattar leu il protocol d’uiara da 1799. Quei ch’ei d’anflar en ina localitad el sutterran dalla casa da scola a Mustér ei bein ina part dalla historia dallas vischnauncas sisum la Surselva, mo il medem mument era ina vart umbrivauna. La gronda part dils documents en cudischs, scatlas da cartun e chistas da lenn ei numnadamein cass da dertgira. Ils documents – per ina buna part screts a maun – tonschan naven da sempels cass entochen ad acts criminals e l’uiara culs Franzos la fin dil 18avel tschentaner. «Probablamein dispona buca mintga archiv d’in protocol d’uiara», di igl archivar Gion Tenner prendend enta maun quei cudisch relativamein voluminus per da gliez temps. Ord sia vesta sco archivar seigi quei protocol senz’auter il pli impurtont document historic digl archiv. Igl archiv dispona da documents screts avon la lescha da 1851 davart la divisiun dil cantun Grischun e cun la constituziun da 1854 davart la formaziun dils 39 circuits. Ils cumins ein daventai successurs dallas 48 vischnauncas giudizialas suveranas veglias. Sco communitad exista la Cadi dapi 1251.

Claras directivas


Igl onn 2015 ein ils cumins vegni aboli ed integrai ella nova structura regiunala dil cantun Grischun. Dapi lu ein ils archivs da quels en responsabladad e survigilonza dallas regiuns, respectivamein dils archivars destinai persuenter. Igl archiv dil cumin dalla Cadi ei vegnius surdaus alla Regiun Surselva miez fevrer 2016. El ei restaus leu nua ch’el era avon, numnadamein en casa da scola a Cons a Mustér. La surdada alla regiun ei succedida tenor directivas dil cantun. Medemamein existan ina lescha ed in’ordinaziun che reglan ils detagls, denter auter tgi che astga prender investa da documents en quels archivs. Ligionta pils archivars ei denton era ina directiva digl onn 1982 che regla il temps ch’ils documents ston vegnir archivai. Prender investa da documents digl archiv san da principi tuttas persunas ni instituziuns che san far valer lur interess persuenter. Consultar san ellas denton mo ils documents che pertuccan ellas sezzas. En cass che ulteriuras persunas ein involvidas els cass vegnan quellas anonimisadas. Medemamein stat igl archiv a disposiziun per retschercas per exempel scientificas. Ils archivs ufficials el cantun Grischun vegnan inspiziai periodicamein ni silmeins mintga siat onns entras igl archiv statal.

In ver scazi

In’investa egl archiv dil cumin dalla Cadi el sutterran en casa da scola Cons a Mustér – dil reminent ella vischinonza digl archiv communal – empermetta igl emprem mument nuot spectacular. Els regals paradeschan cudischs vegls, mo era pli novs, screts a maun ed ils davos decennis cun maschina e lu era scatlas cun documents. Sin la damonda, tgei document che seigi il pli prezius, sto igl archivar Gion Tenner buca ponderar ditg: «Quei ei segiramein il protocol dall’uiara culs Franzos la fin dil 18avel tschentaner.» Igl ei in cudisch ch’ei cunvegness da leger, fuss la scartira aschia ch’ins fagess quei empau pli tgunsch. Ell’emprema construcziun san ins leger: «6 da mars 1799. Ei dat novas ch’igl inimitg seigi sin via.» «In protocol d’uiara ei buca mo enzatgei unic per in archiv pign, mobein era per la Svizra en general», di Tenner ch’ademplescha la funcziun d’archivar cun grond senn da responsabladad. Ei caztgass da prender quels cudischs vegls enta maun e sfegliar. Mo il temps ei limitaus. Tonaton dein nus in sguard en ina da quellas interessantas documentaziuns e constatein ch’ei deva era cass pli sempels sco per exempel igl enguladetsch d’entgins schambuns, carn piertg, andutgels e caschiel. Ei stat scret: «Ina part digl enguladetsch ei vegnida anflada tiel delinquent.» La via avon dertgira cantunala a Cuera ei buca stada d’impedir.

Ina ni l’autra damonda

Con gronds ei igl interess vid ils documents egl archiv? «Jeu survegnel sporadicamein damondas. Il davos temps ei quei stau denter auter en connex cun documents davart affons ch’ein vegni plazzai ordeifer la famiglia enzanua auter», di Tenner ch’ei era archivar communal. Egl archiv sesanflan da principi tuttas fatschentas dil cumin dapi la fin digl 18avel tschentaner. «Quei archiv dil cumin ei secapescha pli interessants ch’igl archiv communal. El ha dapli carn vid igl ies e resplenda en quei senn ina part dalla historia dalla regiun, mo era da carstgauns ed instituziuns», di Tenner. Vegnius en contact ina ga ni l’autra cun documents egl archiv ei era igl anteriur mistral Heinrich Huonder: «En tals cass setractava ei plitost d’enzatgei specific ni d’interess particular.» Avon ch’ils documents vegnien sut survigilonza cumpleina d’in archivar stueva il mistral dar la lubientscha a damondas per astgar prender investa da documents.

Reorganisau igl onn 1971

Huonder ch’ei staus mistral da 1991 entochen 1997 relata entgins detagls dalla reorganisaziun digl archiv: «Pli baul sesanfla igl archiv dil cumin en in tschaler dalla Casa cumin a Mustér. 1971 ei miu bab Ludivic vegnius incaricaus da mistral Leo Friberg da reorganisar el. Ensemen cun professer Martin Soliva, in expert d’archivs, ei igl archiv vegnius reorganisaus tenor directivas dil cantun.» Mandats da castitg dil mistral, sentenzias dalla dertgira circuitala, cass civils relaschai dil mistral e camonds ufficials, averturas da dretg e da concuors, damondas per acquist da schischom ni era lubientschas per lottarias han stuiu vegnir sorti aschi bein sco scartiras da pli baul cun decisiuns giudizialas sco administrativas. Per gronda part setractava ei da documents libers che han stuiu vegnir ordinai e ligiai a cudischs. Suenter la construcziun dalla casa da scola nova a Cons ei igl archiv vegnius plazzaus leu. «Quei archiv ei la memoria dil cumin. Igl ei in relict dil temps passau», di igl anteriur mistral ch’ei era staus vegn onns actuar dil cumin dalla Cadi e notar, mo lu era derschader e president dalla dertgira districtuala sco era derschader dalla dertgira cantunala.