News-Details

Dialog enstagl confruntaziun

20.07.2017

Ils possessurs d’habitaziuns da vacanzas ein en Surselva la ferma petga dil turissem.
A Mustér pagan ils varga melli possessurs d’habitaziuns da vacanzas rodund duas tiarzas dallas taxas dil turissem.
Dils hotels incassescha Sedrun Mustér Turissem strusch 100 000 francs, dils possessurs d’habitaziuns bunamein 800 000 francs. Culla fundaziun dallas gruppas d’interess han ils hosps che sesentan a Mustér miez da casa era ina vusch. Leo Condrau, in indigen cun sedia ella Bassa, ei commember dalla suprastonza dalla gruppa d’interess. Enstagl da confruntaziun giavischa el il dialog cullas instanzas. Quei ei allura era succediu e Leo Condrau conceda che quella discussiun hagi sluccau l’emprema tensiun suenter igl alzament dallas taxas turisticas. «Ei ha caschunau dapli transparenza e nus havein il sentiment da vegnir pri serius.» La gruppa d’interess dils possessurs da vacanzas sesprova da sviluppar purschidas en favur da lur commembers. Condrau sedamonda co ils possessurs d’habitaziuns da vacanzas a Mustér savessien vegnir integrai meglier ellas decisiuns dil turissem, mo era ellas decisiuns politicas e propona ina meisa rodunda per discutar tals fatgs.

Mustér dumbra varga melli habitaziuns da vacanzas cun rodund 2000 letgs. Las habitaziuns da vacanzas ein la pli impurtonta petga dil turissem. Dalla nova lescha da taxas dil turissem introducida il 2015 ein era ils possessurs dallas habitaziuns a Mustér buca stai incantai. Opposiziun alla gronda hagi ei denton buca dau, conceda Leo Condrau. Igl um indigen cun dimora ad Ennetbaden e sedia da vacanzas en siu vitg patern ei commember dalla suprastonza dalla Cuminonza d’interess dils possessurs d’habitaziuns da vacanzas da Mustér. L’uniun ei vegnida fundada il matg avon in onn, pia ditg suenter l’introducziun dalla nova taxa. Alla radunonza da fundaziun ein 86 persunas stadas presentas ed han allura eligiu Christian Peyer sco president. La fundaziun dalla cuminonza d’interess ei stada la consequenza dalla nova taxa turistica. Dil protocol dalla radunonza da fundaziun: «Igl augment dalla taxa ha caschunau malaveglia. L’informaziun davart dallas instanzas communalas documentescha la munconza d’appreziaziun enviers nus sco hosps da tschep.» L’emprema gretta ei tschessada e Leo Condrau manegia: «Ils discuors cullas autoritads communalas han sluccau l’emprema tensiun. Ils possessurs d’habitaziuns ston vegnir pri serius e ston haver l’impressiun che las taxas vegnien era duvradas cun senn e tenor la lescha.»

Tschercar il dialog
«Ina dallas incumbensas impurtontas ei la tscherca dil dialog culla vischnaunca e culs purschiders da prestaziuns turisticas», di Condrau. Il medem mument constatescha el che la vischnaunca profiteschi bein dils possessurs d’habitaziuns da vacanzas, quels hagien denton negina vusch. Cun ina cuminonza d’interess spera el ina migliur. La visiun dalla cuminonza d’interess seigi da crear ina situaziun «winwin». «La vischnaunca ed ils possessurs d’habitaziuns da vacanzas duein profitar», giavischa Condrau. La cuminonza tscherca era il discuors cun autras cuminonzas d’interess da possessurs d’habitaziuns da vacanzas, en special culla cuminonza d’interress dalla vischnaunca da Tujetsch. «Ensemen essan nus pli ferms», manegia il vischin da Mustér che s’engascha sco president dil comite d’organisaziun dalla Trofea Péz Ault en favur dil turissem el vitg claustral. Tier il contact tier las instanzas vul la cuminonza d’interess era promover il contact culla populaziun indigena. «Nus essan era part da quella.»

Miez milliun dapli
Culla nova taxa turistica pagan ils possessurs da casas da vacanzas a Mustér bunamein
in miez milliun dapli. Tenor la cuminonza ei la contribuziun carschida da 353 000 francs igl onn 2014 sin 784 300 igl onn 2016. «Quei senza plivalur», constatescha il president dalla cuminonza d’interess Christian Peyer. Che quei resti buc aschia s’engaschi el. Quei engaschi munti denton buca confruntaziun. «Confruntaziun porta nuot», ha il president dall’uniun detg. «Nus essan buc adina dil medem meini, mo cul dialog s’avischinein nus ed ei dat dapli transparenza.» Ils bunamein 800 000 francs pagai dils possessurs d’habitaziuns da vacanzas ein duas tiarzas dallas entradas totalas dalla taxa. La cuminonza d’interess sesprova da sviluppar purschidas en favur dils possessurs d’habitaziuns da vacanzas. Ina da quellas purschidas ei ina carta da cumpra per indigens e possessurs d’habitaziuns da vacanzas. Sco il president ha informau duei quella vegnir realisada el decuors da quest onn.