News-Details

Era egl avegnir in glatsch artificial?

24.08.2017

DA HANS HUONDER / ANR
Ils davos onns ha il Center da sport e cultura procurau repetidamein per discussiuns el cussegl da vischnaunca. Venderdis vegnan quellas cuntinuadas, quella ga ha ei num decider da principi schebein il glatsch artificial duei vegnir mantenius ni buc. Il Center da sport e cultura Mustér ei cun sia gronda purschida lunsch entuorn unics. Quella cumpeglia buca mo la gronda halla plurivalenta, mobein era la halla da tennis, la halla da reiver, ils indrezs da spinning e fitness sco era las pusseivladads da seminari ella Sala Fontauna e la caschun da dimora per camps da giuvenils. La cafetaria ei il liug da sentupada suenter las activitads dil sport e dalla cultura e da gronda impurtonza ein era ils indrezs externs che surveschan a differents sports da stad e d’unviern. Dapi la construcziun dalla part principala dil center igl onn 1980 eis el vegnius adattaus successivamein e per part era sanaus. La pli gronda adattaziun ei succedida ils onns 1990 cun la secunda etappa, vul dir la construcziun dalla Sala Fontauna e dalla plazza da ballapei. Sin ina part dalla plazza da ballapei ei vegniu decidiu da realisar in glatsch artificial. Dalla damonda, schebein quel duei vegnir mantenius egl avegnir en quella fuorma, sefatschenta il cussegl da vischnaunca quest venderdis.

Impurtonta purschida
Il mars passau ha il cussegl da vischnaunca da Mustér concediu in credit da 375 000 francs per la projectaziun dalla sanaziun e cumpletaziun dil Center da sport e cultura. Il medem mument ha la cumissiun da menaschi dil center incaricau la HTW Cuera da sclarir il nez dil menaschi. La finamira ei da modernisar il center, mo il medem mument era da reducir ils cuosts. «Mo per reducir ils cuosts basegna ei per part era investiziuns», scriva la suprastonza communala el messadi per mauns dil cussegl da vischnaunca. En quei connex ei era il glatsch artificial staus in tema da discussiun ed il menaschi da quel ei vegnius empau pli exactamein sut la lupa. Las frequenzas sil glatsch ein stadas ils davos onns pli u meins stabilas ed ei semuossa ch’el ei ina purschida oravontut sco alternativa da dis d’unviern cun malaura. Perencunter ein ils cuosts dil menaschi dil glatsch carschi. Sin fundament dils cuosts ha la cumissiun da menaschi sclariu alternativas, respectivamein da remplazzar il glatsch cun in sistem cun material sintetic cun plattas semegliontas ad in glatsch. Quei sistem drova negin’energia. La cumpra d’ina tala surfatscha muntass a 432 000 francs. Quella cuvrida ha denton era disavantatgs. Aschia sa per exempel buca vegnir dau curling sin quella. La resistenza dallas patinas ei treis ga pli gronda che sin in glatsch convenziunal.

Mantener il glatsch?
En sia seduta dil venderdis sera sto il cussegl da vischnaunca decider schebein il glatsch artificial duei vegnir mantenius era egl avegnir ni sch’el duei vegnir remplazzaus cun ina cuvrida sintetica. Sedecida el per il glatsch vegn ei ad esser necessari da cumprar ina nova maschina per la preparaziun da quel. La maschina veglia ha 49 onns e sto vegnir remplazzada. Gia tier la cumpra entras il Center da sport e cultura era ella in’occasiun. Igl ei buca pli pusseivel da retrer tocca per reparar ella. La maschina nova ei calculada cun cuosts da 155 000 francs. La suprastonza communala propona al cussegl da vischnaunca da mantener il glatsch e da cumprar la maschina. Il glatsch artificial seigi ina purschida singulara ella regiun ed in’attracziun per hosps ed indigens. En unviarns cun pauca neiv eis ella ina
buna alternativa.