News-Details

Biro d’informaziun egl avegnir alla staziun

05.10.2017

DA HANS HUONDER / ANR

Egl avegnir dat ei a Mustér mo pli in liug per l’informaziun turistica, numnadamein alla staziun dalla viafier. Il post d’informaziun che sesanfla tier las pendicularas vegn serraus primavera.
Dapi che Sedrun Mustér Turissem ha serrau il biro d’informaziun amiez il vitg ei l’informaziun succedida alla staziun da viafier e tier las pendicularas a S. Catrina. Quella situaziun ha apparentamein buca cuntentau aschia che la suprastonza communala ha dau l’incarica ad ina cumissiun da far ponderaziuns nua che l’informaziun duei esser futuramein. «Quella cumissiun ei la finfinala vegnida alla conclusiun ch’il biro d’informaziun duei esser alla staziun, leu nua che nus havein gia uss in post d’informaziun», di Curdin Brugger da Sedrun, president da Sedrun Mustér Turissem. Consequentamein eis ei previu da sligiar si il biro tier las pendicularas e da menar egl avegnir sulettamein quel alla staziun da viafier. Tenor Brugger metta la Viafier retica a disposiziun alla staziun ina localitad adattada persuenter. Il medem mument duei la signalisaziun vegnir migliurada. «Nus lein nezegiar las sinergias cun la Viafier retica e la Viafier Matterhorn Gottard. Leu arrivan e partan fetg biaras persunas», puntuescha Brugger. Allas Pendicularas Mustér SA ei Sedrun Mustér Turissem promts da porscher maun pertuccont l’informaziun turistica el Catrina Resort ch’ei en construcziun il mument: «Ei secapescha da sesez che nus collaborein cun tut ils partenaris turistics gronds.» Il biro principal cun administraziun da Sedrun Mustér Turissem sesanfla a Sedrun. A Mustér ein ina entochen duas persunas occupadas ell’informaziun.

In onn difficil
Il rapport annual da Sedrun Mustér Turissem ch’ei cumparius en vesta alla radunoza generala da gievgia, ils 5 d’october 2017 allas 20.00 en halla Cons a Mustér documentescha la situaziun difficila dil turissem igl onn vargau. En quel puntuescha Brugger: «Ord vesta dils hosps da vacanzas essan nus – Tujetsch, Mustér ed Andermatt – ina destinaziun. Cunfins da vischnauncas e cantuns interesseschan buc els.» Sedrun Mustér Turissem vegli setener era egl avegnir vid sia strategia cun la Tgina dil Rein e Mustér sco vitg claustral. Plinavon aviseschi l’organisaziun ina buna collaboraziun cun tuts purtaders da prestaziun turistics. En in temps economic e turistic difficil seigien ina buna collaboraziun, qualitad, amicabladad, innovaziun e cuntinuitad da grond’impurtonza. Tenor il meinafatschenta Hans-Kaspar Schwarzenbach han novas discussiuns davart in pool da marketing communabel cun Andermatt retardau igl onn vargau la fundaziun d’ina societad acziunara pil turissem els treis loghens. Consequentamein ha Sedrun Mustér Turissem sistiu il project.

Dameins pernottaziuns
Il diember da pernottaziuns ei danovamein sereducius. A Mustér han ins sentiu che plirs hotels ein vegni serrai ni vegnan duvrai per in auter intent. La consequenza: La Reka generescha persula dapli pernottaziuns che tut ils hotels a Mustér ensemen. Igl onn da turissem 2016/17 han ils hotels da Sedrun e Mustér generau 84 296 pernottaziuns, 2011/12 era quei aunc 113 094. Sin fundament dalla nova lescha da turissem eis ei buca pli pusseivel d’eruir il diember da pernottaziuns ella parahotellaria. La statistica dallas pernottaziuns ella hotellaria ei pusseivla sin fundament dallas cefras ch’ils hoteliers furneschan agl Uffeci per statistica federal. Il diember da cartas da hosp ei carschius ton la stad sco igl unviern vargau, in indezi che quella purschida ei tschercada e vegn appreziada. «Gnanc ina destinaziun da turissem el Grischun investescha ina aschi gronda part dil budget en prestaziuns da consum pils hosps sco Mustér e Sedrun», puntuescha Schwarzenbach. Tenor informaziuns da Curdin Brugger ei la suprastonza da Sedrun Mustér Turissem puspei cumpleta. Dapi igl emprem da fenadur representa Renato Decurtins la suprastonza communala da Tujetsch en quella. Avon era quei post staus vacants duront rodund in onn. Alla radunonza generala da Sedrun Mustér Turissem vegnan las duas cuminonzas da possessurs da secundas habitaziuns da Mustér e Tujetsch ad informar davart lur activitads, finamiras ed interess.