News-Details

Pur­schi­da du­ei veg­nir co­or­di­na­da

06.10.2017

Pur­schi­da du­ei veg­nir co­or­di­na­da
Ho­tel niev ad Ac­la da Fon­tau­na e Cen­ter da sport e cul­tu­ra a Mus­tér vu­lan col­la­bo­rar

Da Hans Huonder / anr

Proximamein vegnan ils investurs dil niev hotel ad Acla da Fontauna a Mustér ad inoltrar la damonda da baghegiar. Ina tala ei bein avon maun, mo vegn uss aunc adattada. Mathis Störi, sviluppader da project dalla Brandis Investement AG a Maiavilla, spera d’obtener la lubientscha igl emprem quartal da l’auter onn. Parallelmein sper la projectaziun dils detagls marschan era discuors denter la societad e la vischnaunca, concretamein pertuccont il Center da sport e cultura. «Nus essan en contact culs investurs ed emruein d’adattar la purschida futura ad Acla da Fontauna», di Clemens Berther, president dalla cumissiun da menaschi dil center. La finamira ei da realisar da mintga vart dalla via infrastructura che concurrenzescha buc ina l’autra, mobein cumpletescha la purschida. Pusseivel eis ei era ch’ei dat in passadi sut la via cantunala che colligia ils dus menaschis. Tenor Störi ei la purschida dil Center da sport e cultura in dils motivs d’investar a Mustér, in auter ein ils gronds projects turistics che vegnan realisai il mument ella regiun denter Mustér ed Andermatt. Pil project dil hotel niev ad Acla da Fontauna exista gia in plan d’areal. Medemamein ei ina lubientscha per construir la surbaghegiada avon maun. Il project vegn ussa denton aunc surluvraus sin fundament da giavischs dils investurs. La finamira ei d’arver il hotel e las habitaziuns igl onn 2021.

Maun en maun cun ina bu­na pur­schi­da
Il ho­tel niev ad Ac­la da Fon­tau­na ed il Cen­ter da sport e cul­tu­ra Mus­tér du­ein co­or­di­nar lur pur­schi­da

Avon rodund treis jamnas eis ei vegniu enconuschent ch’ei duei dar in hotel niev sco era habitaziuns administradas e secundaras ad Acla da Fontauna a Mustér. Davos las culissas vegn luvrau mordio vid il project. En discussiun ein ils iniziants da quel era cun la vischnaunca pertuccont il Center da sport e cultura. La purschida dils dus menaschis duei vegnir coordinada. «Sigl areal dil hotel Acla da Fontauna a Mustér vegn erigiu ina nova surbaghegiada per 100 milliuns francs. La Societad pil svilup dil project Acla da Fontauna ha cattau in investur. Igl ei la Immo Invest Partner AG da Glattbrugg.» Cun quellas construcziuns entscheiva la communicaziun als mieds da massa da miez settember. Sigl areal dil hotel vegl ad Acla da Fontauna, sco era parcellas vischinontas, eis ei previu da realisar in hotel cun rodund 170 combras sco era 100 habitaziuns administradas e secundas habitaziuns. L’infrastructura duei allura vegnir commercialisada e menada entras ina enconuschenta gruppa d’hotels internaziunala. Tenor Frenk Djordic dalla Immo Invest Partner AG a Glattbrugg eis ei previu d’arver la surbaghegiada nova l’entschatta 2021. Igl optimissem pil project niev deriva oravontut dil svilup dalla regiun sisum la Surselva, Alpsu ed Andermatt. Il hotel Acla da Fontauna ei serraus e vits dapi 2001. L’entschatta digl onn ha la Banca Cantunala Grischuna vendiu las treis parcellas digl areal alla Societad pil svilup dil project Acla da Fontauna cun sedia a Maiavilla. Davos quella societad stattan la Miro Immo AG cugl architect Michael Schumacher a Cuera, la Due Sentieri AG da Franz Hidber sco era la Brandis Investment AG digl impressari Andreas Zindåel.

Project vegn surluvraus

Sco quei che Mathis Störi, sviluppader da project dalla Brandis Investement AG a Maiavilla, ha detg sin damonda dall’Agentura da novitads rumantscha vegn il project dil hotel e dallas habitaziuns surluvraus il mument. Per quei project exista gia ina lubientscha da baghegiar, mo muort las midadas che sedattan uss en connex cun giavischs digl investur sto quella vegnir adattada: «Sche tut va tenor plan vegnin nus a far la damonda da baghegiar aunc uonn alla vischnaunca. Damai che nus setenin vid il plan d’areal ed il project ei buca resch novs quintein nus da survegnir la lubientscha igl emprem quartal digl onn vegnent», di Störi. Ina lubientscha han ils investurs era per spazzar il baghetg vegl. Cun spazzar el vul ins denton aunc spitgar: «Avon ch’entscheiver cun las lavurs lein nus la lubientscha da baghegiar.» Tenor Störi eis ei previu da reciclar ina part dil mterial, in’autra part sto vegnir dismessa. Negins problems pli gronds vesa Störi en quei connex era cun substanzas nuscheivlas el baghetg sco per exempel asbest: «Quei ei a nus enconuschent. Il tractament da quellas substanzas ei ina part dil project.» El quenta cun in temps da dus entochen treis meins da spazzar il baghetg existent.

Collaboraziun cul CSC

Ch’igl ei reussiu alla Societad pil svilup dil project Acla da Fontauna da perschuader in investur dil project ha plirs motivs. D’ina vart ei quei il svilup cun nova infrastructura turistica sisum la Surselva, Alpsu ed Andermatt. Mo lu era il Center da sport e cultura che sesanfla buca lunsch naven dil hotel previu. «Nus sentin ch’igl interess per novaziuns ei avon maun a Mustér», di Störi. Il president dalla cumissiun dil Center da sport e cultura sco era dalla cumissiun da baghegiar da quel, Clemens Berther, confirma ch’ins ei en contact culs investurs: «Nus havein gia giu plirs discuors. Ei dat differentas ideas co nus savessen nezegiar las sinergias. La finamira ei claramein quella da buca concurrenzar in l’auter, mobein d’adattar vicendeivlamein la purschida.» En contact ein il mument era ils dus architects incaricai dad omisdus projects, pia il hotel niev, respectivamein l’adattaziun e sanaziun dil Center da sport e cultura. Denter auter vegn era discussiunau davart in sutpassadi denter il hotel ed il center. Tenor Berther ei cunzun il plaz da ballapei cun cuvrida artificiala curdaus en egl als investurs: «Sin quei plaz sa vegnir fatg sport baul la primavera entochen tard igl atun. Sin da quellas altezias sur mar sco Mustér ei quei buca dapertut il cass en Svizra.»