News-Details

Treis accents – ina speronza

10.10.2017

(anr/abc) Venderdis sera ein ils acziunaris dallas Pendicularas Mustér SA s’entupai – sco mintg’onn a Caischavedra – per la radunonza generala. Il president dil cussegl d’administraziun metta la strategia da success sin treis petgas. Igl ei stau ina radunonza ordinaria ella fuorma usitada. Il president dil cussegl d’administraziun Marcus Weber ha saviu beneventar 88 acziunaris che han representau 92 pertschien dil capital d’aczias. Era siu antecessur Heinz Schumacher sco era il president d’honur Luregn Mathias Cavelty ein vegni a Caischavedra alla radunonza generala. Avon treis onns haveva Schumacher surdau il tgamun dallas Pendicularas Mustér SA definitiv en auters mauns. Suenter ch’els dus sco representants dalla famiglia tudestga Arenberg havevan confundau igl onn 1969 la societad e baghegiau si il menaschi sco petga pil turissem d’unviern, ha il Basiles Marcus Weber surpriu miez 2014 la pluralitad dallas aczias. Il cussegliader da fatschentas ha surpriu ina gronda sfida. Oz ei la situaziun semidada, la conjunctura aulta ei daditg vargada. El sectur turistic drova ei sforzs extraordinaris, cunzun pervia dil clima ed il secuntener dils hosps.

Liungas proceduras

La 48avla radunonza generala si Caischavedra ha buca cuzzau ditg, suenter ina mes’ura ha il president saviu serrar ella. Ils presents han approbau ils rapports annuals, quel dil president Marcus Weber sco era quel dil directur Rudolf Büchi. Omisdus han menziunau ils dus unviarns in suenter l’auter che han influenzau negativ il quen. Cun 4,7 milliuns francs ein las entradas stadas rodund 200 000 francs pli bassas ch’igl onn precedent. Silla gliesta da tractandas fuva era l’elecziun dil cussegl d’administraziun. Tuts commembers ein stai a disposiziun pil proxim onn da fatschenta. Cul president Marcus Weber fan part da quel Vincent Augustin, Paolo Billi, Francestg Cajacob, Paul Christen e Martin Kreiliger. Marcus Weber ha ludau ses collegas, ei seigi in bi luvrar cun quella equipa. Quitaus fan meinsvart ad el las liungas proceduras per survegnir las lubientschas. El discuors cull’anr ha Weber accentuau che la collaboraziun culla vischnaunca seigi stretga ed emperneivla, perencunter drovi ei savens bia pazienzia da contrahar cullas organisaziuns digl ambient. Malgrad tut: Cun quellas eis ei gartegiau da secunvegnir en connex culla paliu e la zona d’ennevar denter Caischavedra e Gendusas. L’ennevaziun artificiala ei tenor Weber in da treis accents che vegnan a garantir a liunga vesta il success dallas Pendicularas Mustér SA. Il project vul la societad realisar en quater etappas, ina da quellas ei il lag artificial per rimnar l’aua. Quei ch’ins astgi buc emblidar seigien ils cuosts da menaschi ch’ils novs cundrezs caschunien.

In stausch sil 2019/2020
Il president dil cussegl d’administraziun ei perschuadius che la societad vegn a dumignar las sfidas el turissem. Aunc ina pintga caussa fa quitaus ad el: «Nus sentin enorm sche las previsiuns dall’aura ein memia negativas», memia savens constateschien ins che l’aura a Mustér seigi bia megliera che annunziada ellas medias. Lu il secund accent: Grondas speronzas metta Weber silla colligiaziun dils territoris da skis da Mustér e SedrunAndermatt. La colligiaziun ei previda cun ina pendiculara, cun cabina per 70 persunas. Sche votantas e votants da Tujetsch approbeschan la confinanziaziun vulan las pendicularas realisar aschi spert sco pusseivel il project. Sigl areal dalla staziun a val a Sontga Catrina ei dapresent la construcziun dil resort buca da surveser. Sigl unviern 2018/19 ein las empremas 80 habitaziuns semtgadas e silla stagiun 2019/20 vegn igl entir Resort Catrina cun 800 letgs ad esser aviarts. Allas pendicularas cuosta quell’investiziun rodund 90 milliuns francs. Weber ei evidentamein perschuadius dil stausch che la destinaziun Mustér vegn a survegnir quei mument. Il president dil cussegl d’administraziun ha surpriu avon treis onns la maioritad d’aczias dallas pendicularas da Mustér. El ei digl avis che la destinaziun turistica Mustér ei silmeins aschi attractiva sco l’Engiadina Bassa, la patria da sia mumma. Igl ei ina casualitad ch’il Resort Catrina vegn aviarts ufficialmein exact silla 50avla stagiun dallas pendicularas Mustér. Grondas speronzas metta Weber sils hosps dil sid. Igl ei il tierz accent che Weber manegia. Milaun seigi mo rodund duas uras e mesa naven da Mustér, il Tessin e l’Italia dil nord cun 2,5 milliuns habitonts hagi in grond potenzial. La garanzia ch’il Pass dil Lucmagn ei aviarts igl unviern duess esser ina sfida dad attrer aschi biars sco pusseivel sul pass.