News-Details

La Zai SA vul dislocar la producziun

10.10.2017

DAD ANDREAS CADONAU/ANR

Ils emploiai dalla manufactura da skis Zai a Mustér ein vegni surpri avon biebein ina jamna dalla relaschada sin la fin mars 2018. Igl avegnir dalla marca Zai e medemamein dil fundatur dalla interpresa Simon Jacomet resta incerts. Las explicaziuns dil tgamun dalla interpresa Zai, Benedikt Germanier, en il BT dalla fin dalla jamna cuntegn dapli damondas che rispostas pertuccont igl avegnir dalla manufactura da skis fundada avon 15 onns da Simon Jacomet. Propi segir ei sulet ina caussa, als emploiai da Zai ei vegniu communicau avon biebein ina jamna ch’ils contracts da lavur vegnien sligiai sin il pli tard la fin mars 2018. Per la gronda part dils otg emploiai da Zai ina surpresa, sco igl ei stau d’intervegnir ord lur ravugl. Il rest dallas indicaziuns da Germanier ein dètg neblusas e cuntegnan paucas indicaziuns concretas. Principalmein nua ch’ils skis da Zai vegnan produci egl avegnir. Ils cuosts da producziun a Mustér paran, tenor las indicaziuns da Germanier, memia aults ed il diember da skis vendi po buca curclar quels cuosts. Incerts resta medemamein igl avegnir dil fundatur da Zai Simon Jacomet. El ha getg da buc esser staus involvaus ellas conclusiuns novissimas dil cussegl d’administraziun dalla interpresa ed el hagi era buca da far enzatgei cun las decisiuns actualas. Dapli vul il fundatur da Zai momentan buca communicar. Clar ei denton che Jacomet ha, el decuors dils onns vargai, cuntinuadamein fatg attent a sia finamira persunala da scaffir plazzas da lavur e plivalur ella
regiun. Ussa vegn el relaschaus dalla interpresa ch’el ha sez fundau. Era sch’il meinafatschenta dalla Zai SA, Benedikt Germanier, ha getg vier il BT che la rolla da Jacomet enteifer Zai stoppi vegnir definida da niev. Segir ei ch’il vent ella branscha da skis buffa pli criu. Adina dapli skiturs affitteschan igl equipament enstagl da cumprar skis. E sco ei para senta era il segment da luxus quei trend.

Innovaziun cuntinuada

Dabia laud ha la manufactura da skis domiciliada a Mustér retschiert ils davos 15 onns per sia innovaziun cuntinuada ella construcziun da skis. La «spada», il ski lantschaus da Zai avon biebein diesch onns cun in coc da crap, ha cattau gronda attenziun. E quella innovaziun ei colligiada fermamein cun la persuna da Jacomet che ha luvrau el svilup da skis per ina interpresa pli gronda avon che fundar sia atgna interpresa avon 15 onns. La terminologia romontscha duvrada per definir ils products da Zai ei part dalla filosofia da fatschenta, medemamein iniziada dil fundatur. In avegnir dalla manufactura Zai senza il fundatur e spért creativ Jacomet ei strusch imaginabla. Malgrad tutta innovaziun ha la societad acziunara cun ina sviulta da circa treis milliuns francs giu breigia da recaltgar cefras neras. Divers tagls da capital ein stai necessaris e sco ei para ein ils investurs buca pli promts dad impunder niev capital. Silmeins buca senza midadas essenzialas che portan alla interpresa novas perspectivas. Indicaziuns concretas davart igl avegnir dalla Zai SA ein denton buca da retscheiver, il tgamun, Benedikt Germanier, ei buca staus contonschibels.

Mustér ei surprius dalla decisiun
Surprius dalla decisiun dalla Zai SA da terminar la producziun da skis a Mustér ei era il menader dalla scola da skis, Giusep Flepp. El deplorescha quella decisiun ed ei dalla opiniun che la manufactura da skis hagi purtau ina certa reputaziun al liug turistic. La preschientscha dad ina interpresa innovativa el sectur da skis seigi segiramein d’engrau ad ina destinaziun da skis. Era sche Zai seigi buc in product per la gronda massa dils skiturs hagi il ski anflau dabia accoglientscha en in segment pli avanzau. In segment per part era presents el territori da skis da Mustér.