News-Details

«Maruns, frestgs e buns maruns…»

14.11.2017

(anr/sr) Ier po ei haver giu empau dameins stans e visitaders che usitau alla fiera da s. Martin a Mustér. Silmeins tochen miezdi han ils marcadonts buca giu da far immens bia cun vender lur products. Memia biars han schau stermentar dad ina féffa neiv e dalla ferdaglia. Quels ch’ein stai a Mustér – la finfinala tuttina gnanc aschi paucs – han gudiu l’atmosfera, da s’entupar cun enconuschents, dar ina paterlada e cumprar tscheu e leu enzatgei flot. La finfinala dat ei resti cauld e capetschas per enzatgei. La purschida als stans ei stada varionta ed ei ha franc giu enzatgei per mintga gust. In bien caschiel d’alp ni in fondue dils purs che fan vendita directa, ina biala decoraziun dalla stizun da fluras Solèr ni dils numerus stans che han vendiu caussas zambergiadas. Massa biala rauba ha ei era dau da cumprar als stans dalla Casa Depuoz a Trun, dall’Argo a Glion ni dalla Soldanella a Rueras. En favur dils pertuccai dalla bova a Bondo han ils commembers dil Lions Club Rheinquelle vendiu mams, suppa ed auter bien.

Buca sco pli baul

Sco igl ei tier la fiera da s. Martin vegnan biars plitost mo per mirar ni s’entupar cun enconuschents ed auters era per degustar e cumprar. Carmalau e fatg surstar ier ha il clom neu dil stan dils brassamaruns: «Maruns, frestgs e buns maruns…!» Ed il bi ei che la dunna clamava neutier la glieud per romontsch. Sco Marisa Baumeler-Schnoz ha raquintau sin damonda dall’Agentura da novitads rumantscha eis ella per l’emprema ga stada presenta cul stan da maruns alla fiera da s. Martin. Mo ella seigi oriunda da Segnas e dapi enzacons onns presenta cul stan da maruns als tils da tscheiver a Sedrun e Mustér. «Vender maruns allas fieras e conversar culla clientella ei bellezia, cunzun si cheu nua che jeu enconuschel dabia glieud», ha Baumeler-Schnoz declarau. Sco enconuschent era la fiera da s. Martin pli baul la caschun per pagar ils deivets. Oz fa probablamein negin pli quei da s. Martin ed aunc bia auter ei semidau ni iu a piarder. Alfons Berther ei in um da Mustér che viseta onn per onn la fiera tradiziunala e quei fetschi el cun plascher. Tuttina ha el manegiau ch’ei seigi buc il medem pli sco pli baul. Avon onns havevi ei bia dapli stans ed ei vegnevi hanlegiau e quei buca mo tier il «Giachenbienmarcau». Oz vegn strusch enzatgi pli sin l’idea da hanlegiar. Forsa stuess ins puspei ina ga activar quei usit?