News-Details

L’auter onn era scolars dalla Namibia

24.11.2017

DA HANS HUONDER / ANR

 

Avon biebein in onn ei Roman Walker vegnius eligius sco rectur dil gimnasi dalla claustra a Mustér ed il schaner passau ha el surpriu definitivamein sia funcziun. Sia bilanza suenter rodund in onn da lavur ei positiva. Ella muossa denton buca mo ils success contonschi en quei onn, mobein era las varts umbrivaunas d’ina scola media ella periferia. «Miu antecessur Bruno Hensler ha empruau da posiziunar il gimnasi sco marca ed ha dau dapli peisa allas relaziuns publicas e la communicaziun. Cun quels principis less era jeu cuntinuar», di Walker. El temps da Hensler ei denton era in’internaziunalisaziun concreta dil gimnasi vegnida instradada e quella ha medemamein ina successiun sut l’egida dil rectur niev: «Nus cuntinuein cun las stentas da dar la pusseivladad a giuvenils da differentas tiaras da studegiar tier nus. Adina denton cun risguard da nossas valurs e nos principis.»

Da pliras tiaras
Igl internat dil gimnasi dils buobs ei occupaus il mument fetg bein, sulettamein aunc ina combra ei vita. «Nus constatein ch’ils mattatschs vegnan plitost a Mustér egl internat dil gimnasi che las mattatschas», di Walker. Da 39 giuvenils egl internat ein il mument sulettamein endisch giuvnas: «Las mattatschas han magari pli grondas difficultads da sedistaccar en quella vegliadetgna d’amitgas. Quei ei auter tiels buobs.» In ulteriur pass ha la direcziun dil gimnasi fatg pertuccont internaziunalisaziun. Il mument visetan quater Chines la scola, 2018/19 vegn ei ad esser siat. Leutier vegnan differents scolars da tiaras europeas sco Germania ni Pologna sco era in dils Stadis Uni dall’America. Da niev vegnan treis scolars dalla Namibia a visitar 2018/19 il gimnasi a Mustér. Tenor Walker ei la selecziun da quels scolars fatga. En quei connex ha il gimnasi luvrau stretgamein ensemen cul ministeri d’educaziun dalla Namibia, mo era cun la Fundaziun Domenig ch’ei engaschada leu. 18 giuvenils dalla Namibia eran s’annunziai per vegnir a studegiar a Mustér, treis ein la finfinala vegni risguardai.

Agentura a Shanghai
Pertuccont ils interessents dalla China lavura il gimnasi ensemen cun in’agentura a Shanghai. Leu ei glieud engaschada ch’enconuscha bein il vest. «Il mument preparein nus era documents per eventuals interessents dall’Egipta», di Walker. Ensemen cun Samih Sawiris vegn mess fil en guila en quei connex. Aschia duei vegnir fatg reclama egl avegnir el hotel The Chedi ad Andermatt. «Sch’enzatgi dall’Egipta cun affons ha leu ina habitaziun sch’ei Mustér lu buca pli ina gronda distanza da viadi. A Kairo ston ils giuvenils era viagiar la damaun entochen in’ura per arrivar en scola», constatescha Walker. Tgiradas vegnan vinavon era las relaziuns cul Tessin. Per interessents dil cantun vischinont vegn offeriu dus cuors da tudestg la stad vegnenta. Il gimnasi a Mustér dumbra il mument rodund 180 scolaras e scolars. «Il diember ei stabils, mo ei pretenda da nus di per di novas stentas da tener quei nivel», accentuescha Walker.

Il dialog culs scolars

Ina novaziun al gimnasi ei la nova representanza dallas scolaras e dils scolars enviers la direcziun dalla scola. «Sche nus lein sviluppar vinavon la scola, lu ein il meini ed il dialog culs scolars da grond’impurtonza», constatescha il rectur. La direcziun dalla scola stoppi haver in’ureglia attenta, ils scolars da lur vart denton ina bucca aviarta, vul dir far paleis lur basegns e giavischs. En mintga classa vegn era organisau mintg’jamna in’ura da discussiun davart temas che fatschentan ils scolars. La representanza dallas scolaras e dils scolars ei dil reminent vegnida eligida en in process democratic e cun ina sentupada e presentaziun dils eligi ella sala Peter Kaiser. Per tener quen dalla qualitad cuntinuescha il gimnasi era cun las investiziuns. Il mument ei il tract dallas scienzias naturalas en planisaziun. Walker quenta leu cun cuosts da rodund 1,5 milliuns francs. Enteifer il cerchel dils scolasts vegn ei a dar entginas midadas il proxims temps. Gia bandunau la scola ha Kilian Grütter. Tenor
Walker ein la direcziun da scola ed el sedecidi da seseparar. Marc Schmed vegn a remetter la funcziun da prefect, resta denton magister. El ei vegnius eligius sco plevon dalla Pleiv libra evangelica a Tavau. Medemamein vegn Clau Scherrer a bandunar il gimnasi sco dirigent dil chor. Enconuschentamein daventa el niev directur dalla Scola da musica Surselva. A bandunar il menaschi vegn era Steffi Grobmeier. Quei per motivs persunals.

Lescha dat da discussiunar
Tenor Walker eis ei previu da reactivar la biblioteca dil gimnasi. Menadra da quella vegn la magistra Claudia Foppa ad esser che seperfecziunescha il mument en quella funcziun. Plidentaus concernent la revisiun dalla lescha da scola media dil cantun Grischun di Walker: «Ensemen cun las autras scolas medias essan nus sefatschentai dalla lescha el rom dalla procedura da consultaziun. Da principi va quella ella dretga direcziun, ei dat denton aunc entgins puncts dispiteivels.» Aschia duei vegnir garantida era egl avegnir l’autonomia dallas scolas medias privatas el cantun Grischun.