News-Details

In ulteriur inscunter da perscrutaders d’energia

29.11.2017

DA HANS HUONDER / ANR

Per la tiarza ga organisescha la Fundaziun Center da perscrutaziun d’energia alpin la fin da schaner dis d’energia a Mustér. El rom da referats, mo era d’in arranschament per la publicitad vegnan pusseivladads futuras dalla producziun d’energia ellas muntognas discutadas. Igl avegnir s’auda all’energia regenerabla, era en Svizra. Per quei motiv eis ella ina part integrala dalla «strategia d’energia 2050» dalla confederaziun. In’impurtonta rolla en quei connex savessen las Alps giugar. Per accelerar la discussiun davart las pusseivladads che fussen pusseivlas ellas muntognas ha la fundaziun lantschau avon dus onns ils dis d’energia. Als dus emprems arranschaments – igl onn 2016 ed il schaner passau – ein experts d’energia e perscrutaders da pliras tiaras s’entupai. El center dallas discussiuns ein temas actuals davart la producziun ed il consum d’energia stai. Sco quei che la fundaziun constatescha deriva ina buna part dalla energia gia oz dallas Alps. Quellas experientschas, novas tecnologias e pusseivladads vul ella promover per garantir vinavon allas muntognas ina rolla centrala ella producziun dall’energia electrica.

Dar novs impuls
Mustér ei dapi plirs onns il liug da dietas davart l’energia. Avon quels dus arranschaments
ei il Swiss Energy Podium vegnius organisaus duas gadas. Igl atun 2013 eis el sefatschentaus dil lenn sco energia digl avegnir e la primavera 2015 ei il futur dall’energia cun forza hidraulica staus el center. Omisduas ga ein representants dils uffecis federals ni cantunals sepresentai sco era referents d’impurtontas instituziuns. Cun las «discussiuns davart la perscrutaziun d’energia», respectivamein ils dis d’energia, sa quella retscha da dietas davart l’energia vegnir cuntinuada. La Fundaziun Center da perscrutaziun d’energia alpin dat en quei connex auters impuls. El focus stattan surtut tecnologias
e pusseivladads futuras dalla producziun d’energia.

In tschuppel referats

Ils proxims «discuors da perscrutaziun d’energia» a Mustér han liug dils 24 entochen ils 26 da schaner 2018. Danovamein han ils organisaturs engaschau ina partida referents. Duront ils treis dis vegn numnadamein purschiu buca meins che 36 referats, vul dir sessiuns pintgas cun differents temas. En quels referats vegn era presentau exempels concrets da resultats davart la scienzia d’energia. Ils 25 da schaner 2018 envidan ils organisaturs dalla Fundaziun Center da perscrutaziun d’energia alpin era quella ga ad in arranschament public. A quel ein era indigenas ed indigens envidai che vulan s’informar davart las pli novas tendenzas ella perscrutaziun e la producziun d’energia. Sco quei ch’il cau dall’organisaziun, Ivo Schillig, di vegn era il hotel Acla da Fontauna ad esser in dils temas. Enconuschentamein eis ei previu da spazzar quel. En quei connex setschenta la damonda co il material sa vegnir reciclaus optimalmein e nezegiaus per in ulteriur edifeci.

Scienzia e pratica
Il Center da perscrutaziun d’energia alpin ei vegnius fundaus la fin avrel 2016 a Mustér en fuorma d’ina fundaziun. La finamira da quel ei da promover l’energia che sa vegnir producida ellas Alps. El ei in’instituziun senza profit che sefatschenta ella perscrutaziun a moda interdisciplinara dil nez dall’energia en favur dils cantuns da muntogna sco era ulteriuras regiuns alpinas. AlpEnForCe sefatschenta da damondas dalla tecnica, dallas scienzias economicas, dall’economia regiunala, dil dretg e las scienzias politicas sco era d’eventualas autras disciplinas relevontas. La finamira dil center ei da collaborar cun differentas instituziuns da perscrutaziun naziunalas ed internaziunalas. Medemamein emprova la fundaziun d’empustir contacts cun la pratica. Ils resultats da perscrutaziun che vegnan elavurai vegnan presentai per exempel el rom da conferenzas, workshosps, studis, strategias ni en concepts d’energia sco era en manuals ed arranschaments da perfecziun. Els fuorman la basa per projects e cussegls concrets per la pratica, en special era per la creaziun da cundiziuns da rama politicas.

Dils 24 entochen ils 26 da schaner 2018 organisescha il Center da perscrutaziun d’energia alpin
per la tiarza ga las «discussiuns davart la perscrutaziun d’energia» a Mustér. Quei arranschament
ei era cumbinaus cun ina presentaziun publica da differents temas ils 25 da schaner 2018.  Ils referats ed igl arranschament public vegnan organisai en claustra a Mustér. Interessents san annunziar gia ussa lur participaziun tier alessia.togni@alpenforce.com