News-Details

Pendicularas Mustér SA spetgan sin las davosas decisiuns

15.12.2017

DA HANS HUONDER / ANR


La finamira dallas Pendicularas Mustér SA ei da realisar la nova pendiculara da Sedrun si Cuolm da Vi– Parlet igl onn vegnent. Tenor il president dil cussegl d’administraziun Marcus Weber ei quei realistic, aschilunsch che las davosas decisiuns crodan ils proxims dus meins. Sco quei ch’ils responsabels dallas Pendicularas Mustér SA, Marcus Weber e Rudolf Büchi, han orientau la gievgia endamaun ils mieds da massa ei il project per la pendiculara nova vegnius suttamess agl Uffeci da traffic federal. Quei mument che quel dat la concessiun ston las pendicularas sulettamein aunc risguardar il temps da recuors avon che saver entscheiver cun las lavurs da construcziun. Per saver far quei drova ei denton era aunc il consentiment dalla vischnaunca da Tujetsch. Ferton che Tujetsch sco Mustér han gia approbau la revisiun dalla planisaziun locala concernent il territori e che Mustér ha gia sincerau sia participaziun finanziala maunca quella da Tujetsch aunc. Passau las tortas ha era il plan directiv cantunal entras ils uffeci federals cumpetents. Medemamein ei la revisiun dalla planisaziun locala da Tujetsch vegnida acceptada l’entschatta november 2017 dalla regenza.

Entschatta primavera 2018?
Sco quei che Weber e Büchi dilucideschan lessen las Pendicularas Mustér SA entscheiver cun la construcziun dalla pendiculara nova la primavera 2018: «Sche quei ei pusseivel sa ella vegnir messa en funcziun sin la stagiun d’unviern 2018/19. Nus savessen organisar lu ina grond’avertura da plirs indrezs novs e dalla colligiaziun dils territoris da skis d’AndermattSedrun e Mustér. Crodan las decisiuns a Tujetsch denton buc ils proxims dus meins vegn quei buc ad esser pusseivel. Nus spitgein ina decisiun da Tujetsch. Sche la vischnaunca vul buca la pendiculara nova, lu duei ella dir quei. Il temps che nus stuein spitgar sin la decisiun cuosta daners a nus.» La pendiculara nova ei calculada cun cuosts da 16 entochen 18 milliuns francs. Ensemen cul restaurant da muntogna che vegn realisaus leu tschontscha Weber da rodund 20 milliuns francs. «Quella pendiculara survescha buca mo a nus pil menaschi d’unviern, mobein surtut per la stad ed igl atun. En Svizra dat ei buc aschi biaras pusseivladads da saver serender cun ina pendiculara en in territori alpin aschi ault che porscha la caschun da viandar, mo era d’ir cun velo. Turisticamein fuss quei ina gronda attracziun per la regiun», puntuescha Weber. Il grond avantatg dalla pendiculara fussi ch’era glieud meins movibla savessi ascender levamein il cuolm cun la pendiculara. Il project preveda ina sortida a Cungieri cun agid d’ina scala. La pendiculara pudess transportar 70 persunas, leusi vegness in restaurant da cuolm cun plaz per rodund 100 persunas.

Vendita communabla
Tenor Weber persequiteschan las Pendicularas Mustér SA sco l’Andermatt Sedrun Sport SA la finamira da sepresentar egl avegnir communablamein sin la fiera: «Cun la colligiaziun da tariffas havein nus fatg in emprem ed impurtont pass. Naven da dus dis dat ei ina purschida communabla dallas duas societads. Ensemen lein nus denton era vender egl avegnir igl entir territori da skis d’Andermatt, Alpsu e Sedrun entochen Mustér. Lu savein nus concurrenzar culs territoris gronds en Svizra.» Sin damonda, con lunsch ch’ins vegli ir en quella collaboraziun, rispunda Weber: «Giuridicamein vegn ei a restar tier duas societads da pendicularas. Las structuras dils dus menaschis ein differentas, aschia havein nus per exempel a Mustér era il resort sco element ligiont cun las pendicularas.» Vid il project dalla pendiculara da Sedrun si Cuolm da Vi–Parlet lavuran las Pendicularas Mustér SA intensivamein dapi treis onns. En cooperaziun cun las organisaziuns per la protecziun digl ambient han differents obstachels saviu vegnir surmuntai. Tonaton dat ei aunc enzennas da damonda pertuccont la purschida da stad el territori accessibel cun la pendiculara nova. Tenor Büchi duessen quellas differenzas denton saver vegnir purificadas. Las Pendicularas Mustér SA ein il mument denton buca mo confruntadas cul project per la pendiculara nova a Sedrun. Era il resort caschuna aunc enqual fastedi. «Naven dil fevrer stuein nus vender la purschida nova, vul dir empruar d’occupar aschi bein sco pusseivel las habitaziuns e las combras el hostel naven dall’entschatta dalla stagiun d’unviern 2018/19», di Weber.