News-Details

Corinne Staub alla testa da SMT

12.01.2018

rtr) Sch’il pensum fiss stà lev na vess il presidi da Sedrun Mustér Turissem (SMT) betg interessà ella, di la dunna da 45 onns. Ella vegn proponida da las suprastanzas communalas da Mustér e da Tujetsch per manar l’organisaziun turistica sisum la Surselva. Dacurt haja insatgi ditg ad ella ch’ella vegnia a chattar in mantun stgaglias. Mo quai saja ina dumonda da la perspectiva. Là nua ch’insatge na giaja betg sco ins giavischia dettia quai pli bleras pussaivladads da far funcziunar quai. Sche quai na gartegia betg stoppian ins forsa laschar ir tut da l’aua giu. Ed ins haja era gia fatg prognosas e ditg che suenter in onn bittia el tut per il tempel en. Ma Corinne Staub manegia ch’ella na veglia betg ceder suenter in onn, mo insacura saja quai alura da memia da mo schliar dispitas etc. Sco spezialista da communicaziun cun ina atgna firma a Turitg sa ella dentant co ins po evitar dispitas. I dependia co ins discurria cun la glieud e co ins sa preschentia ed ageschia. U ditg cun auters pleds: Sco ins clomia viaden en il guaud è l’eco. Ins stoppia dentant ponderar tgi che clomia. Ina da sias emprimas lavurs sco nova presidenta da Sedrun Mustér Turissem (sch’ella vegniss eligida) fiss da furmar in team. Ins sto er eleger novas persunas en suprastanza ed in nov directur a la radunanza extraordinaria dals 18 da schaner. Furmar in team saja surtut ina lavur davos las culissas, ed ella possia s’imaginar che quai na cuntentia betg la populaziun: SMT haja ina organisaziun nova, ma nagut marschia. Staub cumpareglia la lavur da furmar in team cun in trenader en il sport, per ex. en il ballape. Sch’ins haja ina equipa nova na sappian ins betg anc tge fermezza che mintga persuna haja. Sco sportista (che va tranter auter cun velo e cun skis) e sco persuna ch’è regularmain a Mustér – ella posseda ina abitaziun secundara a Faltscharidas dapi 2013 – enconuscha ella la regiun ed ella chapescha era bain rumantsch. Ella veglia ch’ins patratgia en l’avegnir surtut era regiunal, vul dir per ex. sch’ins haja ina loipa da passlung a Sedrun ubain in center da sport e cultura a Mustér duai quai avair in effect fin a Glion. E sch’ina strategia na funcziunia betg haja ella en quests cas er in plan B e C.