News-Details

La Dertgira nauscha ei stada allerta igl onn vargau!

13.02.2018

Ne­gin ei mit­schaus
La Dert­gi­ra nau­scha ei sta­da all­er­ta igl onn var­gau

Da Hans Huonder / anr

Ils da Mustér, Tujetsch, Medel e Sumvitg ston dar quitau tgei ch’els traffican igl onn ora. Cass cuntrari ein els spert sin gliesta da tractandas dalla Dertgira nauscha. Quei ei buca stau auter uonn. Ier sera ha il tribunal da tscheiver preligiu sias tractandas e sentenzias e la gliesta da quellas ei stada fetg liunga. Naven dil hotel Oberalp e la halla plurivalenta a Sedrun entochen l’orgla en baselgia a Surrein. Mo era ils da Medel ein buca mitschai, aschi bein secapescha sco ils da Mustér. Da differenzas ella politica ed il turissem ei danovamein stau la tschontscha aschi bein sco la filosofia dalla cumissiun da baghegiar, il Center da sport e cultura e naturalmein il hotel Acla da Fontauna ch’ei in tema permanent dalla dertgira. Pendiu vid la fuortga ha la Dertgira nauscha l’iniziativa No-Billag. Ella seigi igl exempel per tuttas iniziativas lantschadas senza tgau. La Dertgira nauscha ei mintg’onn igl arranschament da tscheiver final sisum la Surselva. Mintg’onn attira ella fetg bia glieud.


Vid la fu­ort­ga cun No-Bil­lag
La Dert­gi­ra nau­scha ha sal­vau sia se­du­ta la se­ra dil glien­dis­dis tschei­ver a Mus­tér

La sera dil gliendisdis tscheiver s’auda a Mustér alla Dertgira nauscha. Era uonn ha quella clamau la populaziun a sia seduta publica. La gliesta da tractandas ei stada pulpida. La finfinala ha la dertgira pendiu vid la fuortga l’iniziativa No-Billag sco exempel per tuttas iniziativas che vegnan lantschadas senza tgau. La Dertgira nauscha ha giu liug per la 30avla ga. Igl onn 1987 ha l’Uniun da tscheiver Mustér schau reviver ella e dapi lu eis ella vegnida tenida cun ina pintga interrupziun. Sco quei ch’ins sa leger en ina publicaziun da pader Ambros Widmer permiert era igl usit dalla Dertgira naschau tschessaus entuorn 1780, en mintga cass denton avon l’invasiun dils Franzos. La fin da quei usit pudess vegnir attribuida allas cumedias che vegnevan lu dadas pli e pli el vitg duront quei temps e che pudessen haver remplazzau la Dertgira nauscha. Ils motivs exacts ein denton buc eruibels. Dapi che la Dertgira nauscha ei vegnida reactivada gauda ella gronda calamita tier la glieud, buca mo da Mustér, mobein dall’entira regiun. La gronda lavur che vegn prestada da derschadras e derschaders vegn remunerada sin quella moda.

Tractandas senza fin
Las tractandas e las conclusiuns dalla Dertgira nauscha ch’ein dil reminent era da retrer sco protocol a scret ein danovamein stadas numerusas uonn. Il tribunal da tscheiver ha giu da far il tgil plein en vischnaunca, mo era els vitgs vischinonts. Aschia a Sedrun cul hotel Oberalp: «Nus lamentein cheu a Mustér gleiti dapi decennis ch’ei schabegia nuot cul hotel dils Beltgs. Mo atgnamein savein nus esser bi leds ch’el stat aunc adina. Pertgei sch’ins mira co igl ei iu cul hotel Oberalp enta Sedrun, ei in coloss da betun che stat pli u meins agrad si aunc adina meglier ch’ina stermentusa ruosna cun in plazzal da baghegiar amiez il vitg nua ch’ei schabegia nuot. Mo atgnamein eis ei clar daco ch’ins sa momentan buca baghegiar enta Sedrun. Las cranas ein si Sontga Catrina.» Mo buca mo quei. Era la pendiculara sil Cuolm da Vi ei stada in dils temas dalla dertgira il gliendisdis sera: «Sche nus essan gia a Sontga Catrina e tier pendicularas. Cun la pendiculara sil Cuolm da Vi stat ei buca bein. A Mustér lessen ins dar gas. En Tujetsch plitost frenar – quei tut tenor la luna, l’aura, ni… nus savein era buca propi tgei. Basta! Tschintschau vegn in sper l’auter ora e cu gliez gida era nuot pli, lu vegn mo pli tschintschau via medias. Il resultat tuna lu aschia: ‘Ich meine me dörf scho au erwarte, das Gmeind Tujetsch en gwüsse Nutze het davo. Und suscht simmer eifach Gartezwärg. Dia dumme Gartezwärge i dem ganze Umzug.’»

Ils nanins da curtgin
L’expressiun cul nanin da curtgin ha dil reminent accumpignau la Dertgira nauscha l’entira sera, buca mo en connex cun las fatschentas en Tujetsch. Nanins da curtgin dat ei dapertut. Apparentamein era a Mustér en connex cun la cumissiun da baghegiar: «La Dertgira nauscha ei sedumandada dapi cu che Mustér ha in maletg dil vitg che fuss da mantener specialmein? Ei dat bein la claustra e tscheu e leu in pèr casas veglias. Forsa amiez Segnas – denton propi mo leu – dat ei in maletg dil vitg che fuss da mantener. Mo schiglioc? La Dertgira nauscha ei dil meini che si en la vischinonza digl Utoring san ins far nuot pli falliu. Denton gest leu paran ei da metter gronda peisa che las casas mirien ella dretga direcziun per gie mantener il maletg dil vitg. Nus supponin che tgei che va a prau cul maletg dil vitg ni buca dependa plitost digl architect e sias relaziuns cun la cumissiun da baghegiar.»

Dils da Medel e da Sumvitg
La Dertgira nauscha ha era analisau empauet la situaziun politica e dall’infrastructura ellas vischinauncas vischinontas. Aschia a Medel: «Ils Medelins duein lu semplamein buca vegnir sin l’idea da vuler fusiunar, perquei ch’ei anflan buc in niev president. Also silmeins buca cun Mustér. Nus duvrein buc aunc bia dapli surfatscha e cunzun buc aunc bia dapli infrastructura spatitschada dapertut entuorn e ch’ei buca vegnida mantenida. Pertgei probabel ei quei tactica. Tener bass il pei da taglia, far neginas investiziuns en l’infrastructura communala e lu fusiunar e schar pagar ils auters.» Mo era il turissem a Sumvitg ha fatschentau ils derschaders: «Basta, silmeins ei Sumvitg Turissem buc igl entir temps ellas medias cun lingias grassas negativas. Igl ei denton era aunc buca clar schebein Sumvitg Turissem seligia cun Surselva Turissem ni Sedrun Mustér Turissem ni plitost cun Glarnerland Tourismus ni tuttina sur la Greina cun la Organizzazione Turistica Regionale Bellinzonese ed Alto Ticino. Quella decisiun vegni aunc pér prida proximamein, sco ei tuna. Ins lessi seprofitar dallas bunas experientschas che Sedrun e Mustér han fatg e fan di per di ensemen.» Sedrun Mustér Turissem e la cooperaziun cun Andermatt ein medemamein vegni tematisai extendidamein.

LQ ni GR?
E naturalmein che las medias metschan era buca dils commentaris dalla dertgira: «La Quotidiana ei en pitgiras. Aschi ditg ch’igl ei gartegiau da far gudogn cun ella ha Lebrument fatg ella e salvau il gudogn per el. Ussa ch’ei dat in deficit duein auters surprender quel. Perquei tut che studegia co far e co finanziar la gasetta. Fetg impurtonts messadis vegnan era d’in renomau scribent romontsch – in dalla Cadi – quel en la val stretga cheugiu. Ins hagi fatg tut falliu. La «Gasetta Romontscha» vess ins stuiu salvar e buca mischedar e far ina per tut ils Romontschs. Paradox ei ch’il medem scribent pren bugen ils daners ch’el survegn per palesar siu meini – ch’ei atgnamein gnanc dumandaus – dad exact quella gasetta che vala nuot tenor el.»

Sentenziau No-Billag
Il Tir cantunal en Surselva, la claustra, la stampa, l’economia en general, l’Uniun da commerci e professiun Mustér, mo era la gastronomia, UniPoliSi, la renovaziun dalla baselgia a Rabius e la nova halla plurivalenta a Sedrun han dau da discutar aschi bein sco la midada da meinafatschenta el Center da sport e cultura. Mo lu era ina remarca per Surrein: «En baselgia ei vegniu montau ina hazra orgla, in ver keyboard rustical. Il quen ei levs: Per mintga habitont da Surrein dat ei tschun fiffas e sch’ins reparta las fiffas sin quels che van en baselgia mintga dumengia, lu dat ei schizun tschien fiffas per mintgin.» La finfinala ha la Dertgira nauscha era giu da prender ina sentenzia finala, tschercond in delinquent. Quel ha ella era anflau uonn ed ha pendiu l’iniziativa No-Billag. Ella seigi igl exempel per tuttas iniziativas lantschadas senza tgau. Denter auter ha la Dertgira nauscha fatg la suandonta cumparegliaziun: «Mintgin ha da criticar enzatgei vid il program da radio e televisiun. U emissiuns che plain buca ni moderaturs che dattan silla gnarva. Mo pervia da quei gest spedir tut dil tempel en? Quei ei gie sco sch’ins vess mal il tgau ed il miedi less tagliar giu el per ch’il mal il tgau cali. Quei fa era negin.»