News-Details

Barmettler per Schwarzenbach

19.04.2018

DA HANS HUONDER / ANR

Simona Barmettler ei nova directura da Sedrun Mustér Turissem e successura da Hans-Kaspar Schwarzenbach. Suenter la demissiun da Schwarzenbach ha SMT stuiu tschercar in niev tgamun per la fatschenta operativa. Suenter ina procedura da selecziun intensiva ha la suprastonza eligiu Barmettler. Sco quei che la presidenta dad SMT, Corinne Staub, constatescha hagien ins priu peda per anflar ina buna successiun: «D’ina vart havein nus tschercau ina persuna professiunala, dall’autra vart era ina che viva ella regiun e ch’intenda buca da bandunar quella aschi spert. Ella persuna da Barmettler havein nus cattau ina fetg buna candidata.» Barmettler ei naschida 1992 a Zug. En in hotel da seminari
ella regiun da Zug eis ella sescolada sco persuna dil fatg dalla hotellaria. Avon che surprender
ina nova funcziun el hotel Ramada ad Engelberg eis ella stada engaschada el contuorn da Zug. Silsuenter ha ella absolviu cun success la Scol’aulta da turissem ed ha luvrau sco assistenta da marketing e vendita tier Lucerna Turissem SA. Igl onn vargau eis ella lu vegnida engaschada da Grischun Vacanzas. Leu ha ella era luvrau denter auter per Sedrun Mustér. «Gia en quella funcziun eis ei curdau si a mi con varionta che la regiun ei e tgei potenzial che la destinaziun ha. Jeu selegrel fetg sin la nova sfida.» Cun sia lavur entscheiva ella igl uost.