News-Details

Tabea Baumgartner nova presidenta

20.04.2018

(anr/hh) Alla radunonza generala la mesjamna sera ei Jacinta Jacomet Lombriser seretratga sco presidenta dil Forum intercultural Mustér. Successura dad ella daventa Tabea Baumgartner. Igl ei aschidadir ina midada da generaziun alla testa dil forum. Suenter esser stada 15 onns en suprastonza e da quei otg onns presidenta ha Jacinta Jacomet-Lombriser remess il presidi. En siu temps d’uffeci al tgamun dil forum ein differents projects vegni organisai, era pli gronds. Denter auter ei quei stau las Pastgas russas a Mustér ni era l’jamna d’inscunter cun la cultura africana. Mo lu era la scuntrada culs Portughes e la finfinala igl onn vargau la sentupada culs Ladins dallas Dolomitas a Mustér. En siu temps da presidenta ei era la collaboraziun cul concert festiv dil dirigent Simon Camartin mintgamai per la fin digl onn sedada. La nova presidenta Tabea Baumgartner ei buc ina nunenconuschenta a Mustér. Ella ei menadra dil Center sursilvan d’agricultura. Ella ei oriunda dil cantun Argovia e surpren cun slontsch il tgamun dil forum: «Jeu sundel motivada. La lavur cun minoritads ei fetg impurtonta ed il mument era fetg actuala en vesta als schabetgs sin quest mund.» Seretratgs dalla suprastonza ein era Adrian Pally e cusseglier naziunal Martin Candinas. Pally ha apparteniu a quella duront sis onns, Candinas dapi igl onn 2006. Da niev en suprastonza entran sper Baumgartner era Donat Albin ch’ei engaschaus professiunalmein a Mustér el Center da transit per fugitivs, sco era l’indigena Felicia Deflorin. Sedeclarada promta da restar en suprastonza dil Forum intercultural Mustér ei Marie-Rose Deflorin.

Dus arranschaments 2017
El center dall’activitad dil Forum intercultural Mustér igl onn passau ein dus engaschaments
stai. Sper la lavur organisatorica en connex cul concert festiv per la fin digl onn ha il forum organisau la scuntrada culs Ladins dallas Dolomitas a Mustér. Duront plirs dis ei vegniu arranschau luvratoris da sault e musica. Il punct culminont ei ina sentupada publica en halla Cons stada. Leu ei vegniu purschiu als presents in program variont da cultura ed informaziuns davart ils Ladins. Denter auter ei la menadra digl Uffeci cantunal per cultura e lungatgs, Barbara Gabrielli, sepresentada cun in plaid, menziunond las particularitads, fermezias e quitaus dalla minoritad linguistica el Tirol dil sid. Sco quei che la suprastonza dil forum ha constatau alla radunonza generala havess igl interess public per quei arranschament astgau esser pli gronds.