News-Details

La suprastonza sto reponderar il project

11.06.2018

(anr/hh) Cun clar pli ha il cussegl da vischnaunca da Mustér returnau alla suprastonza communala il venderdis sera il project per la sanaziun e cumpletaziun dil Center da sport e cultura. Perencunter ha el concediu in credit per la via da Sars–Punt da Brulf sco era priu enconuschientscha dil program d’activitad ed il plan da finanzas 2019–2023. Il Center da sport e cultura a Mustér ei prest 40 onns vegls. En quels rodund quater decennis eis el vegnius cumpletaus ed adattaus, denter auter 1993 cun la Sala Fontauna e la plazza da ballapei. Avon sis onns ei ina gronda part dils indrezs ordaviert vegnida remplazzada e sanada per bunamein in milliun francs ed avon dus onns ei vegniu investau ella sanaziun dallas fatschadas dil nord e vest. La gronda part dil baghetg ei denton aunc adina el stan da 1980 e basegna ina sanaziun.

15,1 milliuns francs
Il venderdis sera ei il cussegl da vischnaunca sefatschentaus dil project da sanaziun ed adattaziun dil Center da sport e cultura per la summa da 15,1 milliuns francs. Gia igl avrel era la legislativa vegnida orientada davart il project. Per la sanaziun digl existent ei previu d’impunder 6,5 milliuns francs, per la purschida nova 8,6 milliuns francs. Aschilunsch ch’il project vegn realisaus en quella fuorma e dimensiun sa la vischnaunca quintar cun in sustegn finanzial dil cantun da rodund 1,2 milliuns francs, plinavon cun in sustegn d’equivalenza entras ils cantuns participai vid il «Program San Gottardo» da circa 690 000
francs. Medemamein sa la vischnaunca quintar cun ina restituziun dalla taglia sin plivaleta dalla confederaziun en connex cun quella investiziun ell’altezia da 650 000 francs. Aschia stuess la vischnaunca quintar da surprender la finfinala 12,56 milliuns francs. Sper la sanaziun dil baghetg existent preveda il project differentas cumpletaziuns ed adattaziuns dil menaschi. Aschia duei l’entrada survir egl avegnir sco zona da sentupada cun cafetaria. El local ch’ha surviu pli baul als pumpiers duei vegnir endrizzau pusseivladads da divertiment ed el local sut la halla da tennis duei vegnir purschiu novas activitads da sport. Las petgas ella Sala Fontauna duein svanir ed aschia far quella sala pli adattada per arranschaments. Il cussegl da vischnaunca ha buca saviu s’accordar cul project sco presentau. Cun otg encunter quater vuschs ed ina abstenziun ha el decidiu da returnar la fatschenta alla suprastonza communala cun l’incarica da surluvrar il project.

Deponiu differents giavischs
Alla seduta dil venderdis sera ei il cussegl da vischnaunca vegnius confruntaus cun
entginas midadas dil project. Tenor il president dalla cumissiun da menaschi e la cumissiun da baghegiar, gerau Clemens Berther, ei quei stau giavischs da differentas varts exprimi suenter l’orientaziun digl avrel. Davart il cussegl da vischnaunca ei lu vegniu in tschuppel giavischs il venderdis sera, formulai a scret ensemen cun la proposta da returnar la fatschenta alla suprastonza communala. Aschia giavischan cusseglieras e cussegliers denter auter da sclarir las pusseivladads per ina plazza da giug interna. Persuenter duei miez dalla halla da tennis survir. Medemamein vesan els in auter nez per differentas localitads. Denter auter duei la cumissiun sclarir igl interess per in simulatur da golf e dar dapli prioritad alla renovaziun dalla Sala Fontauna. L’idea per in local da squash propona ina part dil cussegl d’emblidar, persuenter da realisar in local per spinning. Medemamein duei ei dar ina buna infrastructura da cuschina per la cafetaria. La finfinala pretenda il cussegl da vischnaunca era in studi davart igl indrez da fotovoltaica. Quel duei cuntener pliras variantas. «Las midadas giavischadas san secapescha era haver in effect sin la finanziaziun sco tala, denter auter la contribuziun dil cantun. Mo lu era pertuccont il credit da projectaziun concediu a sias uras da 375 000 francs. Enzacu ei quel consumaus per analisas e studis», di Berther. Ils proxims dis vegni la suprastonza communala a sefatschentar danovamein dil project, silsuenter secapescha era la cumissiun da baghegiar ensemen cugl architect.

Via vegn slargada
Unanimamein ha il cussegl da vischnaunca concediu in credit da 297 000 francs per rinforzar e slargar la via d’uaul da Sars–Punt da Brulf. Il project sto aunc vegnir approbaus dallas instanzas cantunalas. Quella damonda da credit vegn suttamessa al referendum facultativ. Entras la punt nova a Sars ei il territori dalla vart dretga dil Rein accessibels per transports da lenna viers Fontanivas. A Fontanivas sesanfla il plaz da lenna nua che la lenna vegn sortida e rasenada pil transport vinavon cun camiuns da 40 tonnas. Il respargn vid il transport da lenna ord ils uauls da Caischavedra ei gronds, aschilunsch che quels transports san succeder dalla Punt da Brulf directamein viers Fontanivas e ston buca succeder sur Carcarola ed atras il vitg sin in plaz da lenna. Plinavon ha il cussegl da vischnaunca priu enconuschientscha dil program d’activitad ed il plan da finanzas 2019–2023. La suprastonza communala quenta cun investiziuns nettas da 26,27 milliuns francs en quels tschun onns. Plirs projects che crodan en quei temps d’investiziuns ein decidi ni sesanflan gia ella realisaziun, aschia la meglieraziun funsila. Medemamein includa il plan da finanzas la sanaziun e cumpletaziun dil Center da sport e cultura ni era investiziuns en vias communalas, forestalas e la serenera a Raveras. Vegnan tuttas investiziuns previdas el program d’investiziun decididas e realisadas s’augmenta la summa d’emprests entochen igl onn 2023 sin rodund 23,4 milliuns francs. Il deivet net per habitont s’augmenta aschia en quels sis onns da rodund 360 sin rodund 7600 francs.