News-Details

«Mustér ei ina destinaziun per famiglias»

04.09.2018

DA SUSI ROTHMUND / ANR

Monica, Mischa, Marina, Carina, Florina e Ladina – aschia secloman las sis casas novas dil Catrina Resort a Mustér. Actualmein stattan quater sidretg e tochen miez december duei era la construcziun brutta dallas duas autras esser terminada. Culs 13 da december ein las duas empremas casas cun circa 50 apartaments e 200 letgs promtas pils hosps. Lu vegnan era las duas ustrias novas, il hostel ed il Coop, ad arver lur portas. Sigl enorm plazzal dil Catrina Resort a Mustér lavuran numerusas fatschentas ti mordio –
la finfinala duein ils emprems hosps gia saver retrer lur combras ni apartaments ils 13 da december
2018. Sin lu ston las empremas duas casas – quellas giudem – esser semtgadas ed era la construcziun
brutta dallas quater ulteriuras duei esser terminada. Strusch da s’imaginar, damai ch’ins vesa aunc nuot dallas duas casas amiez. Tenor Marcus Weber, il president dil cussegl d’administraziun dallas Pendicularas
Mustér SA, ei quei termin fixaus ed igl investur ei perschuadius che tut il previu ei semtgau ad uras. Sco Weber ha informau ier ils representants dils mieds da massa porscha il resort differents pachets da vacanzas ed era la varianta «all inclusive» duei esser pagabla per famiglias, pertgei quellas s’audien tiels hosps principals dalla destinaziun.

Actualmein marscha ei extrem bia sil plazzas da construcziun dil Catrina Resort a Mustér. La construcziun brutta da quater casas ei terminada e las duas ulteriuras vegnan construidas tochen miez december. L’avertura dallas duas empremas casas cun biebein 200 letgs ei previda sils 13 da december 2018. Tier la part dil Catrina Resort che vegn messa en funcziun silla stagiun d’unviern 2018/19 s’audan era biebein 100 letgs el hostel, la nova stizun da sport, il «Steakhaus Chevrina» e l’ustria Ursus. Il Coop – ch’ei locatari – ha medemamein previu dad arver las localitads novas ils 13 da december 2018. Tiel Catrina Resort s’auda era in parcadi sutterran cun rodund 200 plazs e sis staziuns da cargar per autos a motor electric. Ils cuosts pils stabiliments novs dil Catrina Resort ein calculai cun 62 milliuns francs. Sco Marcus Weber, il president dil cussegl d’administraziun dallas Pendicularas Mustér SA, ha declarau ier a caschun d’ina sentupada culs representants dils mieds da massa vegn la nova telecabina da colligiaziun cun Sedrun a custar 20 milliuns francs e per indrezs d’ennevar eis ei previu d’investar quater milliuns francs. Ensemen cullas investiziuns gia fatgas a Caischavedra muntien las investiziuns totalas pils novs projects a rodund
90 milliuns francs.

Varga 800 letgs
Culs hotels gia extistents, la Lodge, il niev hostel e las sis novas casas cun 140 appartaments per famiglias cun mintgamai quater letgs sa il Catrina Resort la finfinala porscher varga 800 letgs. Las empremas duas casas (cun rodund 200 letgs) ed il hostel cun biebein 100 letgs vegnan aviarts ils 13 da december. Ensemen culs hotels gia existents dispona il resort questa sesiun d’unviern pia da 400 letgs. Duront la sesiun d’unviern vegn ei buca luvrau vid las ulteriuras casas. «Jeu vi buca hosps sin in plazzal da baghegiar
», ha Weber puntuau ed aschuntau ch’ei hagien probablamein gia piars la stad hosps pervia dils disturbis. Dapi l’entschatta matg ei Mathias Häusler en funcziun sco menader da Gastronomia e Hotellaria dil Catrina Resort e las pendicularas. Ruedi Büchi resta directur dallas pendicularas. «Igl ei impurtont da sparter quels dus secturs, quei ein dus munds differents», ha Weber puntuau. Cun satisfacziun ha el fatg da saver che bien 80% dils luvrers sil plazzal da construcziun seigien dalla regiun. Era a liunga vesta sappien ei porscher el resort e tier las pendicularas tochen 200 plazzas (era parzialas). 70–80 da quellas perfin sur onn.

El focus ein oravontut famiglias
«Nus essan en concurrenza cugl entir mund», ei Weber cunscients. Entras las aultas pagas ed il disfavoreivel cuors da scomi seigi ei car da far vacanzas en Svizra. «Cun in bien servis ed ina buna organisaziun savein nus denton ulivar ora quei», ei igl investur perschuadius. «Nus stuein haver novas ideas», ha el puntuau ed ina da quellas para la realisaziun dil niev resort senz’auter dad esser. Tenor
Weber ei Mustér buc ina destinaziun da luxus, mobein ina destinaziun adattada per famiglias e leusuenter hagien ei era construiu. Ils appartaments ein buca luxurius, denton moderns ed endrizzai bein, cumadeivel e pratic en stil alpin. Els han stiva cun cuschina ed ina pusseivladad da durmir pils affons, ina stanza da durmir pils geniturs e secapescha in bogn. Ei vegn era a dar enzacons appartaments da duas combras. Tut ils hosps san guder la partiziun da «Wellness». Corrispundent als differents budgets per far vacanzas dat ei era differents pachets da Catrina. Quels tonschan naven dil prezi per affittar in appartament ni in letg el hostel tochen tier il pachet «all inclusive» che cumpeglia era las tschaveras, il bigliet per las pendicularas, affittar skis ed aschia vinavon. Per retrer las tschaveras vegn ei a dar in sistem cun bons, aschia ch’igl ei era pusseivel da magliar «sil cuolm». Sco Weber ha declarau fuss ei era l’idea dil Catrina da collaborar cun ustrias el vitg sche quellas seigien promtas.

Hosps digl entir mund
Tenor Weber vali ei uss oravontut da far enconuschent la destinaziun ed il resort. A liunga vesta duei il Catrina Resort saver beneventar hosps digl entir mund. Per la commercialisaziun ein l’Arena Andermatt Sedrun SA e las Pendicularas Mustér SA sedecididas d’ir in’atgna via senza Sedrun Mustér Turissem (SDT)
(LQ dils 30 d’uost 2018). Sco Weber ha declarau ier han el e Samih Sawiris mess a disposiziun per quei intent in milliun francs. Quei corrispundi al dubel dil budget che SDT havevi a disposiziun per quei intent. Per la sesiun d’unviern 2018/19 veglien ins seconcentrar d’attrer hosps dalla Svizra, Tiaratudestga,
Frontscha, Italia e dil Benelux. Pli tard vegni il focus era mess sils hosps dall’Engheltiara, Irlanda e dalla Scandinavia. Tgei che duei succeder cun las purschidas inclusas ella carta da hosps dad SDT ha Weber aunc buca saviu communicar, quei stoppi aunc vegnir sclariu.