News-Details

Nezegiau in’unica caschun

01.10.2018

DA HANS HUONDER / ANR
La claustra da Mustér ha envidau la publicitad ad in di dallas portas aviartas. El center ei in’investa ellas lavurs da restauraziun dalla baselgia da s. Martin stada. Bia glieud ha nezegiau quella caschun singulara. Dapi l’entschatta da quest onn ei la baselgia claustrala a Mustér serrada. Survetschs divins vegnan purschi ella caplutta da Nossadunna ni ella baselgia parochiala S. Gions. Per la fiasta dil patrun baselgia s. Martin ils 11 da november 2019 duei la restauraziun dalla baselgia esser terminada. Bia lavur ei gia fatga, mo aunc bia ei da far. Dapresent ein las restauraturas ed ils restauraturs occupai denter auter cun lavurs da schubergiar e manteniment dils maletgs egl arviul dil chor e dalla navbaselgia. Mo era igl altar grond vegn il mument restauraus. Ferton ch’ils maletgs han pitiu ils davos onns da meffa ei il lenn digl altar taccaus da bauslenn che ston vegnir cumbatti per impedir aunc pli gronds donns. Ils maletgs egl arviul ein dil reminent in’ovra digl artist Fritz Kunz ch’ha viviu da 1868 entochen 1947. El ei staus in dils pli renomai picturs ch’ha luvrau en baselgias ella Svizra tudestga da gliez temps. Ils maletgs egl arviul dateschan da 1913, respectivamein 1925. 
Envidau la publicitad
La sonda vargada ha la claustra da Mustér aviert sias portas e dau alla publicitad la caschun da prender investa dil menaschi, mo surtut era dalla restauraziun e sanaziun dalla baselgia da s. Martin. Dapi che las lavurs da restauraziun han entschiet eis ella numnadamein serrada ed accessibla mo per planisaders e luvrers. Per tonaton dar la caschun da veser tgei che marscha en baselgia duront rodund dus onns ei la claustra sedecidida d’envidar in e scadin da prender investa dil stan actual dallas lavurs. En blocs da mintgamai rodund 50 minutas, menai da guids, ei la restauraziun dalla baselgia vegnida presentada als numerus interessents. Els han giu la caschun da serender dil palancau siadora entochen sut igl arviul per veser leu denter auter co ei vegn luvrau il mument vid ils maletgs. Sper in’investa ella restauraziun dalla baselgia ha la glieud denton era giu la caschun da visitar il gimnasi, las localitads digl internat sco era las novas combras d’hotel ella casa baroca. Dapi l’entschatta 2017 stattan las combras a disposiziun a hosps da vacanzas ni per exempel era ad absolvents da seminaris e visitaders d’arranschaments che vegnan purschi en localitads dalla claustra.
Orientaziun entras avat Vigeli
Denter ils blocs d’investa el menaschi ha la claustra era organisau in’orientaziun davart il menaschi ella Sala Peter Kaiser. Avat Vigeli Monn ei selegraus dil grond interess per quei arranschament d’informaziun. El ha puntuau denter auter  l’impurtonza dallas lavurs da restauraziun. Gia avon quater onns ha stuiu vegnir erigiu in tetg all’entrada dalla baselgia per proteger las visitadras ed ils visitaders dalla baselgia da crappa che curdava ord la fatschada. Avat Vigeli ha denton era cumbinau siu plaid cun la speronza ch’ils interessents dil di dallas portas aviartas possien recaltgar impressiuns positivas davart la claustra, il gimnasi, siu internat
sco era la purschida da stanzas per hosps e seminaris. In film ha la finfinala dau ina survesta davart las lavurs da restauraziun ella baselgia da s. Martin ch’ein vegnidas fatgas entochen ussa. Per la fin dalla part informativa han frater Stefan ed il rectur Roman Walker sunau communablamein clavazin. Sco quei ch’il responsabel per l’informaziun tier la claustra da Mustér, Andreas Marte, constatescha ha ei era dau dabia damondas en connex cun la scola ed igl internat. Sper biaras famiglias dalla regiun han era geniturs digl exteriur priu la via sut ils peis per serender a Mustér e s’interessar davart las pusseivladads da scolaziun. Il gimnasi dalla claustra instruescha quest onn da scola 165 scolaras e scolars. En vesta agl onn da scola niev ei la biblioteca dil gimnasi vegnida reactivada. Ella porscha 2500 cudischs e duei animar scolaras e scolars da prender mintgaton in cudisch enta maun. Per scolaras e scolars dall’emprema entochen la tiarza classa dil gimnasi ei ina lecziun da lectura per jamna ella biblioteca obligatoria. La biblioteca dil gimnasi era stada serrada ils davos onns.


Andreas Isler ei responsabels per las immobilias e pils projects da construcziun ella claustra a Mustér. El ei staus in da plirs informants al di dallas portas aviartas la sonda vargada. Denter palancau, maschinas e material da construcziun. Igl interess per la restauraziun dalla baselgia da s. Martin dalla claustra a Mustér ei staus gronds.