News-Details

Sedrun Mustér Turissem duei daventar societad acziunara

08.10.2018

DA HANS HUONDER / ANR

Las vischnauncas da Tujetsch e Mustér suttamettan ina nova cunvegnientscha da prestaziun a Sedrun Mustér Turissem. In dallas finamiras da quella ei da midar l’organisaziun en ina societad acziunara. Alla radunonza generala a Mustér la gievgia sera ei Silvio Schmid vegnius eligius en suprastonza. Sin fundament dalla gliesta da tractandas havess ins pudiu tertgar ch’ei detti ina radunonza ruasseivla da Sedrun Mustér Turissem. Quei ei denton buca stau il cass. Gia la tractanda 3 – il rapport annual – ha dau da discutar. El seigi buca cumplets, differentas impurtontas informaziuns maunchien, denter auter las discussiuns concernent il marketing cun ni senza pendicularas. Vegnius attaccaus ei era il directur partent Hans-Kaspar Schwarzenbach. Siu rapport annual seigi redigius en ina fuorma inacceptabla (mira finiastra). Igl ei tonaton buca vegniu fatg la proposta da returnar il rapport annual per surluvrar. La finfinala eis el vegnius approbaus. La presidenta Corinne Staub ha defendiu igl agir dalla suprastonza da Sedrun Mustér Turissem en connex cul marketing: «Nus havein ina cunvegnientscha da prestaziun cun las duas vischnauncas e sin fundament da quella havein nus buca saviu separticipar al pool dallas pendicularas. Medemamein ha il cantun buca lubiu quei.» La suprastonza beneventi la cooperaziun dallas pendicularas. Vegniu criticau ei era che Sedrun Mustér Turissem ha ussa reservas finanzialas da biebein 250000 francs. Quella critica ha Schwarzenbach refusau detschartamein: «Ina societad cun ina sviulta da bunamein dus milliuns francs sto haver reservas. Exempels dils davos onns muossan che quei ei necessari.» En lur diever seigien quels daners ligiai sin fundament dalla lescha da turissem.

Elecziuns caschunan discussiuns
Silvio Bernasconi per Mustér e Josi Russi per Tujetsch ein seretratgs dalla suprastonza da
Sedrun Mustér Turissem. Per Tujetsch ei il CEO dallas pendicularas d’Andermatt e Sedrun, Silvio Schmid, vegnius proponius ed eligius. El ei gia staus ina ga commember dalla suprastonza, gie ha schizun presidiau l’organisaziun da turissem. Schmid ei bein representant da Tujetsch, mo vegn a defender ella suprastonza ils interess dallas pendicularas d’AndermattSedrun e Mustér. «Jeu less luvrar constructiv ella suprastonza.» Dalla vart da Mustér ei Priska Müller, menadra dil resort dalla Reka a Mustér, vegnida proponida. Quella proposta ei denton buc ida a prau cun la gliesta da tractandas. Cura che quella ei vegnida distribuida era quella tscharna buca tractandada. Ultra da quei ein ils statuts vegni citai. Tenor quels ha la suprastonza d’esser paritetica, pia tuttina biars commembers da Mustér sco da Tujetsch. Cun l’elecziun da Müller fussi quei buc il cass. La presidenta Corinne Staub hagi ina habitaziun secundara a Mustér e vali per quei motiv sco representanta da leu. La finfinala ei vegniu decidiu da buca far quell’elecziun.

Nova cunvegnientscha
Sco quei che gerau Renato Decurtins, delegau dalla vischnaunca da Tujetsch ella suprastonza da Sedrun Mustér Turissem, ha orientau ei la nova cunvegnientscha da prestaziun dallas vischnauncas cun Sedrun Mustér Turissem vegnida approbada quels dis dallas duas suprastonzas communalas. Ella ei vegnida suttamessa alla suprastonza dall’organisaziun da turissem. Tenor Staub duei l’uniun d’ussa vegnir transferida en ina societad acziunara. Quei duei succeder el decuors da rodund treis onns. Sin fundament dalla cunvegnientscha, respectivamein quella midada, duess ei esser pusseivel da separticipar al pool da marketing cun las pendicularas. Danovamein sin tapet ei il diever dallas taxas da turissem vegnius. Ina tiarza da rodund 2,5 milliuns francs tegnien las vischnauncas anavos senza motivs giustificai. Quella renfatscha ei denton vegnida refusada. Las vischnauncas hagien quei dretg, la finfinala hagien ellas d’ademplir differentas incumbensas era en favur dil turissem. Per conclusiun dalla radunonza ein las mesiras da marketing per Mustér e Sedrun vegnidas presentadas dalla representanta da Grischun Vacanzas, Kerstin Sigron. Medemamein ei vegniu communicau la gievgia sera che la Viafier Matterhorn Gottard seigi egl avegnir era igl unviern part gratuita dalla carta da hosps.