News-Details

85 expositurs sepresentan alla ex18 a Mustér

12.10.2018

Ils 85 expositurs san endrizzar lur stans ils proxims dis. Naven dil venderdis, ils 26 tochen la dumengia, ils 28 d’october presentan els lur products e survetschs e speran d’entupar in grond ed interessau publicum.

La valabla exposiziun ei magnet per la glieud dalla regiun ed ils organisaturs han dau tutta breigia d’augmentar igl interess cun purschidas ed inscenaziuns supplementaras. Las viasfier VR ed MGB offereschan ils viadis a Mustér ed anavos per il prezi dil bigliet sempel. In grond spazi retscheivan ils giuvens e las giuvnas. En ina concurrenza d’ideas creativas per animar l’economia en Surselva ein 14 projects inoltrai e vegnan presentai duront ils dis dall’exposiziun. Ina giuria valetescha e ranghescha las ideas presentadas ed ils victurs vegnan premiai il schaner 2019 en in’occurrenza publica. Ina vasta tenda porscha plaz per la restauraziun dils hosps. Ils ustiers e hoteliers dil contuorn surveschan leu las specialitads culinaricas da nossa regiun. L’agricultura indigena ei presenta cun attracziuns ord sia branscha. Ils animals manedels envidan da carsinar e porschan variaziun als affons che frequentan il survetsch da survigilonza ella canorta d’affons Kita. Dasperas astg’il hosp empruar ils buns products dallas alps dil contuorn. In’atmosfera mistica selvadia spetga sil visitader ella halla da reiver nua ch’ils catschadurs dalla Cadi han baghegiau si laghetgs e presentan cun biara fantasia las acziuns da catscha. Ils expositurs sepresentan sco usitau als stans baghegiai dalla firma Hug Standbau Näfels, quei che dat ina biala atmosfera. Lur presentaziun dils products, dils survetschs e purschidas ei denton zun individuala e procura per la variaziun giavischada. Las scolas medias dalla regiun ein presentas all’ex18 ed orienteschan la giuventetgna sur da lur pusseivladads da sescolar e fundar ina buna partenza ella veta professiunala. Quella schanza da far contacts cun giuvenils retscheivan era las ulteriuras branschas presentas. Recrutar emprendistas ed emprendists ei era per els finamira da lur presenza a Mustér. Cun Radiotelevisiun Svizra Rumantscha e la gasetta romontscha dil di La Quotidiana ein las medias bein presentas e rapportan en direct dil liug d’exposiziun. Ils expositurs ed organisaturs dall’exposiziun atunila ein plein entusiassem da s’entupar culla populaziun. Buns discuors dattan bunas relaziuns, quei ch’ei impurtont per l’economia indigena.