News-Details

Niev vehichel per la defensiun abc

11.12.2018

Biars corps da pumpiers ein vegni fusiunai ils davos onns ed ein en relaziun cun pli baul onz pli pigns, mo persuenter tecnicamein sin in fetg ault nivel. In exempel ei il vehichel niev ch’ils Pumpiers Sursassiala han obteniu quels dis per la defensiun abc. Sco quei ch’il cumandant da pumpiers, Gion Tenner, di ha l’Assicuranza da baghetgs dil cantun Grischun ina clara finamira: «Equipar tuttas nov basas da pumpiers per la defensiun abc cul medem material ed il medem vehichel.» Suenter che las basas dall’Ems Chemie a Domat ed ils Pumpiers Tavau han gia obteniu lur vehichel niev ein ils Pumpiers Sursassiala uss in ulteriur corp che vegn equipaus cun in tal. El remplazza il vehichel vegl digl onn 1986. L’investiziun en quei vehichel vegn fatga cumpleinamein dall’Assicuranza da baghetgs dil cantun Grischun. Igl auto inclusiv igl equipament ha custau rodund 300 000 francs. El stat a disposiziun naven dad immediat al corp da pumpiers che dumbra dil reminent il mument 85 dels.

Scolaziun speciala

«Il camiun niev survescha alla defen siun abc, vul dir el cumbat da havarias A (atomar), B (biologic) e C (chemic). Damai che nus stuein cumpletar il vehichel cun dabia material niev ein ils cuosts per suenter lu era pli aults,» di Tenner. Il territori d’intervenziun dils Pumpiers Sursassiala pertuccont la defensiun abc ei fetg gronds. El sestenda naven da Schnaus tochen als pass Alpsu e Lucmagn, inclusiv la vischnaunca da Sursaissa Mun daun. Tenor il cumandant ein 18 pumpiers scolai specialmein pils prighels ed il seracass d’abc. Els frequentan treis exercezis supplementars per onn e mintga dus onns absolvan els in di da perfecziun. Dus instructers ein specialisai sin quei sectur. Tiel vehichel setracta ei d’in ca miun dalla marca MAN TGM 13.290 (13 tonnas, 290 PS) cun tracziun da tuttas quater rodas. Constructur ei l’interpresa Walser SA, Zezras/Rankweil (A). Il vehichel dispona d’ina cabina dubla cun plaz da seser per sis persunas. Igl equipament porscha denter auter sis apparaturas pil schurmetg da flad. La communicaziun ei garantida via func analog e digital. Il vehichel dispona da 12 moduls, da quels ein siat pil survetsch abc. Ulteriurs moduls surveschan agl agid stradal e lavurs da piunier, sco material per intervenziun per viafier. La plattafuorma hidraulica ha ina prestaziun dad 1,5 tonnas.

Differents moduls
Igl intern dil camiun niev consista da differentas parts modularas. Quellas ston ils pumpiers enconuscher en detagl per saver nezegiar suenter material ed apparaturas pil seracass. Ei setracta dils modus per la decontaminaziun; far rempars, retener, serrar giu; colligiar cun tiara, pumpar entuorn; electricitad e ventilaziun; protecziun persunala, uaffens e mesira ziun (labor) e defensiun sill’aua. Leutier vegn igl equipament supplementar dils Pumpiers Sursassiala ch’ei gia avon maun sco era ils moduls cun uaffens hidraulics per viafier; material da piunier grev per la viafier; siaras per aua ed ieli e butteglias d’aria. Dus moduls ein reserva. Leutier vegnan differents uaffens, barschuns, palas, material per accidents stradals e dalla viafier.