News-Details

Ina disciplina sursilvana

29.01.2019

(anr/gv) Avon 55 onns ei l’emprema cumbinaziun da paracurdader ed ir cun skis vegnida organisada a Flem. Werner Nay da Trun ei staus in dils piuniers dalla scena. Igl excellent skiunz cun dimora a Laax ha era gudignau da sias uras impurtontas concurrenzas internaziunalas. Alla cuorsa dil Cup mundial la davosa fin d’jamna a Mustér han ils Austriacs dau en il tun. Oravontut la squadra da «Red Bull Salzburg» ha sgarmau e gudignau ils tetels impurtonts. Alla cuorsa ein 13 equipas da sis tiaras europeicas separticipadas e gudiu oravontut il venderdis in bellezia di da cuorsa. «Cheu eisi bunamein aschi bi sco el Tirol», ha il victur Sebastian Graser constatau duront il sgol cul helicopter da Disla alla partenza rodund melli meters sur il Resort Catrina. En treis segls da precisiun ha el schau nudar total sulet treis centimeters distanza dil center.

La squadra «HSV Red Bull Salzburg» ha dominau a caschun dall’emprema concurrenza dil Cup mundial da «para-ski» da quest onn la davosa fin d’jamna a Mustér. Ella cumbinaziun da siglir cul paracurdader ed ir cun skis han ils quater sportists Manuel Sulzenbacher, Sebastian Graser, Magdalena Schwertl e Toni Gruber gudignau quater medaglias d’aur, treis d’argien ed ina da bronz.

50 sgols
La concurrenza ha entschiet il venderdis d’excellentas relaziuns dall’aura. Quella caschun han ils sportists nezegiau per treis da sis segls cul paracurdader. En varga 50 sgols ha Marcus Levy, il pilot dil helicopter tgietschen dalla Heli Air, transportau ils sportists da Disla sin rodund 2500 meters sur il Resort Catrina. Ella vischinonza da quel era il plaz da setschentar. El helicopter cun porta aviarta sesevan mintgamai quater paracurdaders d’ina squadra. Lur incumbensa ei stada da setschentar cun in pei enamiez la noda dil plaz nudau. Quei han Sebastian Graser, il treidubel campiun mundial dils juniors, ed il treidubel campiun mundial dall’elita, il Tudestg Reinhold Haibel fatg il meglier. Suenter treis segls han els schau nudar ina differenza totala da treis centimeters.

Il vent ha disturbau
La sonda endamaun ei la concurrenza da skis stada sil program. Il ferm vent ha buca mo impediu ils sportists, mobein era las pendicularas. Ina part dils indrezs da transport ei vegnida messa en funcziun cun retard. La cuorsa ei vegnida spustada sil suentermiezdi ed ils ulteriurs treis sgols silla dumengia. La dumengia ha allura la nebla buca lubiu da sgular, aschia che sulet treis segls han quintau. Era ella cuorsa da skis ha Graser mussau sias habilitads ed ei aschia daventaus il victur. «Quei ei in’excellenta partenza en ina sesiun cun campiunadis mundials», ha Graser manegiau. Ella categoria dallas damas ha sia camerata da squadra Magdalena Schwertl gudignau la medaglia d’aur. Igl onn vargau ha ella dominau las concurrenzas dil Cup mundial.

Emprema concurrenza a Flem
La cumbinaziun dil «para-ski» ei naschida a Flem il 1963 cull’organisaziun d’ina emprema concurrenza. Diesch onns pli tard ei Flem era stau igl emprem organisatur d’ina concurrenza dil Cup mundial. Da lezzas uras era Werner Nay da Trun in dils megliers da quei sport. Igl excellent skiunz ha allura era gudignau concurrenzas dil Cup mundial. Ils onns 90 ei Franco Hübner da Glion separticipaus a cuorsas dil Cup mundial da «para-ski» ed ei schizun sequalificaus pils campiunadis mundials els Stadis Uni. A Mustér eis el segidaus culs organisaturs sco coordinatur regiunal. A Mustér hagien ins anflau tut il necessari per organisar ina cuorsa dil Cup mundial, ha Thomas Saurer constatau. El ha tgamunau il comite d’organisaziun. «Cul Resort Catrina havein nus giu tut en in liug. Ils sportists han mai duvrau igl auto.»