News-Details

«El cor essan nus Svizras»

07.03.2019

Igl onn 1970 ein Lutgarde e Godelieve Fonteyn d’Antwerpen vegnidas l’emprema ga en vacanzas a Mustér. Lu aunc cun lur geniturs ed el hotel Disentiserhof vegl. Ils davos onns han ellas giu lur dimora da vacanzas el hotel La Furca. Hosps da vacanzas fideivels ei ina benedicziun per mintga destinaziun da vacanzas. Savens vegn quei denton emblidau, surtut perquei ch’ei dat midadas ellas organisaziuns da turissem ni autras instituziuns. Aschia vegn strusch priu notizia da quellas e quels che vegnan regularmein el liug per far vacanzas. Dus da quels ordvart fideivels hosps da vacanzas ein las soras Lutgarde e Godelieve Fonteyn d’Antwerpen en Belgia. Uonn ein ellas stadas per la 50avla ga a Mustér per guder igl unviern.

Viu il svilup
Igl onn 1958 ein las duas dunnas dalla Belgia vegnidas per l’emprema ga en Svizra, lu sco mattatschas, numnadamein entras l’Intersoc a Mürren ella Surselva bernesa. Silsuenter ein differentas autras staziuns en Svizra suandadas avon che la famiglia Fonteyn arrivi l’emprema ga a Mustér. «Nossas empremas vacanzas havein nus fatg cheu el hotel Disentiserhof vegl. Quei ei stau in sulet onn, gia igl onn 1971 havein nus saviu guder l’infrastructura nova dil hotel Acla da Fontauna», seregorda Godelieve Fonteyn. Igl onn 2001 ha quel serrau, silsuenter ein ellas stadas en vacanzas el hotel Sax, duas stads el Brunni e dapi quater onns ein ellas hosps dil hotel La Furca. Uonn ein ellas per la 50avla ga en vacanzas d’unviern a Mustér, savens han ellas era passentau cheu lur vacanzas da stad. «Cu nus essan vegnidas cun nos geniturs l’emprema ga a Mustér igl onn 1970 sco dunnas da biebein 20 onns era la pendiculara aunc buc en funcziun ed il vitg vesa ora onz auter», di Lutgarde Fonteyn. Bia seigi semidau dapi lu. Dapi ch’ils geniturs ein morts – il bab 1975 e la mumma 1981 – arrivan ellas persulas en vacanzas a Mustér.

Empriu in tec romontsch
«Nus essan bein naschidas en Belgia, el cor essan nus denton Svizras», di Godelieve Fonteyn. Quei ves’ins buca mo vid las fatschas tarlischontas dallas duas soras. Che quei ei veramein aschia dat era il telefonin perdetga. Il clom da quel ei numnadamein il himni svizzer. Cons Svizzers han il himni svizzer che cloman els al telefon? Tut quels onns hagien ellas era mirau da saver far vacanzas a Mustér ni en in auter liug svizzer il temps dil di dalla fiasta naziunala. «Nus havein adina era cumprau la medaglia digl emprem d’uost», di Godelieve Fonteyn. En quei miez tschentaner han ellas buca mo empriu d’enconuscher fetg bia glieud, mobein era la cultura. Entgins plaids romontschs necessaris pil mintgadi san ellas era: «Per exempel bien di – buna notg.» Lur lungatg mumma ei il flam, ellas san denton fetg bein tudestg e cheutras ein ils contacts culs indigens sedai spert en quels onns. Ferton ch’ellas ein
stadas sporadicamein sin pista ils emprems onns ein ellas daventadas viandontas passiunadas: «Nus essan idas fetg bia a spass cheu ed havein era visitau ina camona alpina ni l’autra, sco per exempel quella da Cavardiras. Uss ein las spassegiadas empau pli cuortas, mo nus empruein da far enzatgei mintga di ni da guder la cuntrada dil hotel anora. Nus lein far quei e vegnir a Mustér aschi ditg sco nus pudein», constateschan las duas simpaticas soras ch’ein omisduas ledias. Ellas ein dil reminent buca mo stadas fideivlas a Mustér sco liug da vacanzas, mobein era al mied da transport. Sco pli baul arrivan e partan ellas aunc adina cul tren. Lur vacanzas en Svizra entras l’Intersoc han menau ellas en quels biars onns era els cantuns Valleis, Berna, Turitg e la Svizra centrala, mo lu era a Tavau, Lai e S. Murezi.