News-Details

Ritmus – slontsch – moviment – Movis

16.04.2019

DA PAUL DUFF / ANR

La fin d’jamna vargada ein ils Movis sepresentai alla tribuna. Treis seras ei la halla Cons a Mustér s’emplenida cun in publicum plein buna luna. Las giuvnas saltunzas han mussau lur saults empri duront plirs meins cun prus trenament. Tut loschas e cuntenzas astgan era las mussadras presentar las coreografias ch’ellas han creau per lur scolaras. Buca meins che 120 affons e giuvnas han frequentau las lecziuns da sault e moviment. Duront 19 onns d’existenza ei l’attracziun da saltar s’augmentada cuntinuadamein.

Sault ch’impulsescha la veta
Co il moviment ritmic impulsaus dil «beat musical» sa s’ignivar egl esser dil carstgun semuossa tier la giuvna dunna Aurelia Flepp. Avon 19 onns ha ella fatg ils emprems pass tier ils Movis ed oz eis ella mussadra ed exempel per ils giuvens e las giuvnas che frequentan ils cuors da sault. «Per mei ei Movis moviment, libertad e pissiun», di ella cun perschuasiun. Era sche tala fideivladad semuossa buca tier tuts participonts e tuttas participontas vegn l’impressiun positiva d’haver fatg l’experienza dad accumpignar ellas en lur veta. L’inizianta e fundatura dils Movis ei Esther Hendry. Oz saulta ella el ritmus giuvenil cun sias duas feglias cun medem slontsch ed agilitad. Ella sa sefidar dad endisch gidontras mussadras che partan l’instrucziun cun ella e surprendan las classas dils affons e giuvenils. Els ein reparti en gruppas tenor vegliadetgna e senumnan «MovisGYM, Minis, Midis, Maxis, Angels e Teenys». Ulteriurs ein ils «Movistars, Skydancers, Dancerets, Delirious, Movis PRO e Jazzfusion». Tier ils pli giuvens ein aunc buobs en gruppa. Lur coreografia cuntegn parts da sault e gimnastica. Ellas ulteriuras formaziuns saultan buobas e giuvnas. L’experienza ch’ellas contonschan promovan il senn creativ fatgs en ina gruppa, plinavon contonschan ellas ina lingieradad, in sentiment da ritmus e da moviment.

Ina historia da success cuntinuescha
Tontas acturas han secapescha ina gronda famiglia da fans. Semussau ei quei ellas treis producziuns entras retschas serradas dil publicum. Ils presents han sblatschau el tact dalla musica, han applaudiu e giu grond plascher dallas producziuns. «Mintga segn positiv dil publicum dat a nus motivaziun e fa nus lucs», di Hendry e drezza in engraziament als presents. Denter quels ein numerus affons che sesentan plidentai dallas producziuns da lur amitgas ed amitgs. Movis sa pia quintar cun vegnentssuenter e las saltunzas dad oz ein las mummas dils Movis da damaun. Quei ei in’ulteriura garanzia per il success digl avegnir.