News-Details

Areal da scola pli plascheivel

24.04.2019

(anr/hh) Igl areal dalla casa da scola veglia e la halla Cons a Mustér duei vegnir formaus da niev. Ils cuosts persuenter ein calculai cun rodund 400 000 francs. Ina quarta duei vegnir cuvretga cun ina donaziun fatga dacuort alla vischnaunca. Il plaz avon la casa da scola «veglia» e la halla Cons ei en in miserabel stan e basegna urgentamein ina sanaziun. Buca mo per ch’il plaz mondi buca cumpleinamein en decadenza, mobein era per porscher ina buna infrastructura per arranschaments ch’han liug repetidamein sil plaz, sco per exempel la Dertgira nauscha, la fiera da Nadal ni la fiera dil vitg. Igl ei denton era necessari da disponer d’in bi plaz per scolaras e scolars ni era pils cussadents da Puntreis. La calculaziun da cuosts che las autoritads han laschau far quenta persuenter cun cuosts da bunamein 400 000 francs. Igl ei previu da formar e cumpletar il plaz cun urdeins, formar da niev las scalas, sanar la cuvrida dira e remplazzar l’illuminaziun sigl entir areal da scola sco era sanar mirs da sustegn. Sco quei che la suprastonza communala scriva el messadi per mauns dalla seduta dil cussegl da vischnaunca da gievgia sera ha la vischnaunca obteniu ina donaziun da 100 000 francs d’ina persuna privata. Quella summa duei ussa vegnir investada en quei project, aschia ch’il cussegl da vischnaunca ha da conceder persuenter aunc in credit da 295 000 francs. Plinavon decida el davart in credit da 112 000 francs per l’adattaziun dil passapei en connex cul project da sanaziun dalla Via Cons. Il project per la sanaziun dalla Via Cons vegn dil reminent presentaus miez matg. La sanaziun, denter auter dil passapei, duei aschia ir maun en maun cun la sanaziun digl areal dalla scola e dalla halla Cons.

Vischnaunca fa in bene
Medemamein sefatschenta il cussegl da vischnaunca gievgia sera dil rapport e quen 2018. Il quen dalla vischnaunca da Mustér siara cun in gudogn da pressapauc 237 000 francs e quei tier ina sviulta da rodund 15,5 milliuns francs. Sco quei che la suprastonza communala scriva el messadi ei l’atgna finanziaziun sereducida per rodund 750 000 francs sin 1,76 milliuns francs. Ils cuosts da menaschi ein carschi surtut ellas spartas dall’administraziun generala, la cultura ed il temps liber sco era la scolaziun, formaziun e sanadad. Plinavon ein rodund 150 000 francs dapli vegni prelevai ord finanziaziuns specialas e biebein 100 000 francs pli pauc vegni deponi en finanziaziuns specialas. En vesta allas investiziuns previdas ils proxims onns el Center da sport e cultura cuntegn il quen da gudogn e sperdita 2018 ina cudischaziun dad 1,3 milliuns francs ella prefinanziaziun da quei object. Il quen d’investiziuns siara cun cuosts da 4,87 milliuns francs ed entradas dad 1,42 milliuns francs. Las pli grondas investiziuns pertuccan la Via Acletta cun rodund 680 000 francs, la canalisaziun a Cavardiras cun 587 000 francs, il rempar ella Val Acletta cun netto 1,38 milliuns francs sco era projects forestals cun 187 000 francs netto.